Full seint í rassinn gripið

Þessi ályktun hefði mátt koma miklu fyrr og vera miklu ákveðnari, því stríðinu - og þar með loftárásunum - í Libýu er að ljúka.

Það sem er aðalatriðið í gagnrýni manna á framferði NATÓ - og á við ennþá - er það að samtökin hafa aldrei ljáð máls á samningarviðæðum milli stríðsaðila, þrátt fyrir ítrekaðar óskir Afríkusambandsins og margra nágrannaríkja Líbýu. Það átti frá upphafi að ganga milli bols og höfuðs á Gaddafi og stjórn hans - og notfæra sér undarlega orðaða ályktun Sameinuðu þjóðanna, um að vernda almenna borgara  "með öllum tiltækum ráðum".

Hægt hefði verið að koma í veg fyrir þetta mikla blóðbað og ringulreið, sem stríðið hefur haft í för með sér, með því að beita neitunarvaldi á fundi NATO þegar hernaðaríhlutunin var samþykkt.

Þetta var ekki gert heldur var Össur Skarphéðinsson látinn sjálfráður um málið - og auðvitað gekk hann erinda heimskapitalismans eins og venjulega.

En Vinstri grænir eiga sjálfir stóra sök á, ekki síst Árni Þór Sigurðsson formaður utanríkismálanefndar. Viðbrögð hans, við því að við vorum með í þessum stríðsaðgerðum, voru mjög misvísandi, frá því að vera mjög jákvæð fyrst en svo meira svona afsakandi.

Mótmæli flokksfundar var svo hræsnin sem fyllti mælinn, að álykta aðeins um að segja sig úr NATO en ekkert um möguleika þess að nota þar neitunarvald Íslands - né að berjast á alþjóðavettvangi fyrir að leysa átökin með samningaviðræðum.

Reyndar er Árni Þór alveg sér kapituli í þessum flokki. Hann er helsti talsmaður áframhaldandi samstarfs við Samfylkinguna, er mjög tíðrætt um harða stjórnarandstöðu Sjálfstæðisflokksins og Framsóknar og mikilvægi þess að leyfa þessum flokkum ekki að komast að.

Hann gleymir hins vegar að helsta andstaðan við ráðherra Vinstri grænna kemur frá Samfylkingunni - og erfið staða VG í hinni opinberu umræðu er einmitt til kominn vegna rýtingsstunga frá samstarfsaðilunum.

Ég skil ekki alveg af hverju maðurinn - og fleiri innan Vinstri grænna (Evrópusambandssinnarnir) - skipti hreinlega ekki um flokk og fari í Samfylkinguna. Þá fyrst væri hægt að tala um VG sem hreinan vinstri flokk - og um sóknarfæri fyrir flokkinn.

Fordæma aðgerðir NATO í Líbíu