Athyglisverð þetta um fínasta veður í Fljótshlíðinni, um 10 stig hiti nú þegar sumarið ætti að vera komið á fulla ferð. 
Svo var það nóttin, aðfararnótt hvítasunnudags. Þá frysti víða svo sem hér á höfuðborgarsvæðinu. Það frysti t.d. á Sandskeiði (í fjóra tíma). Frostið fór mest í -2,5 stig. Í Víðidal fór hitinn lægst í 0,2 stig og við Korpu í 0,6 stig.
Á Þingvöllum var frost í þrjá tíma (mest -1,1 stig) en í fjóra tíma í Þykkvabæ (mest -1,4 stig). Hitinn fór niður undir frostmark á fleiri stöðum á Suðurlandi. Sem sé "fínasta veður"!
Þá frysti í Húsafelli, Hvanneyri og víðar í Borgarfirði. Einnig frysti fyrir norðan, svo sem á Haugi í Miðfirði. 
Var ekki einhver að tala um hnattræna hlýnun ...

	Ferðalangar fjölmenna á Hellishóla
Ábyrgðarmaður færslu Tilkynna um óviðeigandi tengingu við frétt

Ekki er alveg ljóst hvers vegna Gunnar Björnsson er að hætta sem forseti Skáksambandsins en líklega er (loksins) komið fram framboð gegn honum - framboð sem gæti bent til óánægju með störf hans.
Í 16 ára forsetatíð Gunnars hefur árangur íslenskra skákmanna hrakað ört. Nær engir efnilegir skákmenn hafa komið fram, eins og sést á slökum árangri þeirra á alþjóðlegum vettvangi, auk þess sem árangur íslenska karlalandsliðsins hefur orðið lélegri með hverju árinu sem líður. 

Þetta sést vel á árangri landans á Reykjavíkurskákmótinu í ár. Þar töpuðu nær allir Íslendingarnir stigum, nema ungu krakkarnir sem græddu einhver stig (en urðu þó neðarlega).

Einnig á Ólympíumótinu í fyrra (2024). Þá varð íslenska karlasveitin í 68. sæti, neðst Norðurlandaþjóðanna (m.a.s. lægri en Færeyingar!). Fyrir mótið var Ísland 46. stigahæsta landið.
Eins og einhverjir muna er besti árangur Íslands á Ólympíumóti fimmta sætið! Það var auðvitað fyrir tíð Gunnars í forsetastóli.

Konurnar enduðu í 58. sæti, einnig neðstar Norðurlandaþjóðanna.

Á EM ungmenna í fyrra (2024) voru 23 keppendur frá Íslandi (en engir á HM)! Aðeins einn keppandinn var með 50% vinninga og þar yfir (5 v. af 9 mögulegum). Sjö voru með 4 vinninga. Fæsta vinninga fékk strákur í efsta aldursflokki, með 2 vinninga (varð nr. 123). Fimm voru með 2,5 vinninga og þrír með þrjá vinninga. Sex Íslendinganna voru með 3,5 v. Sætin voru frá 35-138. Átta þeirra lentu undir 100. sætinu. Lélegasti árangurinn var í þremur elstu strákaflokkunum en þar lenti sá með flesta vinninga í 88. sæti. 12 keppendanna töpuðu stig á mótinu, eða meirihluti þeirra íslensku. Sá sem tapaði mestu missti næstum 50 stig!

Sem sé. Mikil sókn: íslenskt skáklíf "hafi vaxið þétt á tíma hans sem for­seti."

	Gunnar Björnsson hættir sem forseti skáksambandsins
Ábyrgðarmaður færslu Tilkynna um óviðeigandi tengingu við frétt

„Mögu­lega eru það ör­lög fyr­ir ... litla þjóð, að vera með landsliðsmenn sem eru ekki fasta­menn í sín­um liðum.“

Líklega setur nýi landsliðsþjálfarinn met í að velja í landsliðið leikmenn sem ekki eru fastamenn í sínum liðum og meira að segja menn sem komast ekki einu sinni í leikmanna­hópinn. Sá sem þetta síðasta á við er Arnór Sigurðsson sem kemst ekki á bekkinn hjá liði sínu Malmö FF. Þar er reyndar annar Íslendingur, ungur, Daníel Guðjohnsen sem var í byrjunarliði Malmö í síðasta leik og skoraði m.a.s. - en var auðvitað ekki valinn af Arnari.

Þarna er einnig leikmaður sem ekkert fær að spila með liði sínu, þ.e. Bjarki Bjarkason, sem er á mála hjá botnliði Venezíu á Ítalíu. Þá eru Jón Dagur og Andri Guðjohns sjaldan eða aldrei í byrjunarliðinu hjá sínum félagsliðum, liðum sem ekki eru í hópi sterkustu liða í sínum deildum og lið Jóns m.a.s. í b-deildinni þýsku. 

Svo eru það auðvitað gamlingjarnir sem eru valdir: Aron Einar, Jóhann Berg og svo rúsínan í pysluendanum Hörður Björgvin. Sá síðastnefndi hefur ekki leikið einn einasta leik í meira en tvö ár!

Já ekki byrjar nýi landsliðsþjálfarinn vel. Fyrst grátlegt tap fyrir Kósóvó og svo þetta brandaraval fyrir komandi æfingarleiki.

Eigum við virkilega ekki atvinnumenn í fótbolta sem leika reglulega með félagsliðum sínum en eru ekki valdir nú? Jú það eigum við svo sannarlega svo landsliðsþjáfarinn getur ekki afsakað sig með því. Bara til að nefna nokkra sem eru að spila í sterkum deildum ytra:
Vörn: Hjörtur Hermannssson í Grikklandi og Hlynur Karlsson í Svíþjóð.
Sókn: Ísak Sigurgeirsson í Svíþjóð, Sævar Magnússon í Danmörku og Stefán Sigurðsson í Noregi. Síðast en ekki síst má nefna Elías Ómarsson, sem er fastamaður í liði sínu í efstu deild hollenska boltans, en virðist ekki koma til greina í íslenska landsliðið!

Já hann er undarlegur þessi nýi landsliðsþjálfari.

	Útilokar ekki að skipta um markvörð
Ábyrgðarmaður færslu Tilkynna um óviðeigandi tengingu við frétt

Mæl þú kvenna heilust, Sólveig Anna! Þetta þéttingardogma leiðir ekki aðeins til slæms birtuskilyrða í blokkarhverfum heldur einnig til stórhækkaðs íbúðaverðs sem allt venjulegt fólk hefur ekki efni á. Ástæðan er fyrst og fremst algjört lóðaorkur í borginni en von um hátt lóðaverð er eimitt það sem liggur að baki þessari dogmu um þéttingu byggðar.
Annað er einfaldlega fyrirsláttur. Borgin hefur verið illa rekin lengi, mikil skriffinnska og útþennsla "bálksins" hefur gert það að verkum að allar klær hafa verið úti til að mata krókinn þar á meðal á rándýrum lóðum.
Þetta hafa svo lukkuriddarar Hrunstímans nýtt sér og byggja eins mikið magn og hægt er á lóðum þeim sem þeir hafa keypt á okurverði, annað hvort af borginni eða af öðru stórhöfðingjum eins og Ólafi Ólafssyni og fleiri lóðabröskurum.
Borgarstjórnarmeirihlutinn gerir auðvitað ekkert í þessum málum, sem þeir þó geta í gegnum skipulagsráð og byggingarfulltrúa, enda þeim í hag. Skipbrot vinstrimennskunnar er algjört og kominn tími til að fá almennilegan Verkamannaflokk til að koma skikkan á málefni höfuðborgarinnar.

	Sólveig Anna gagnrýnir þéttingu byggðar
Ábyrgðarmaður færslu Tilkynna um óviðeigandi tengingu við frétt

Svo virðist sem skipuleg aðför að möguleikum íbúa höfuðborgarsvæðisins til útivistar sé yfirstandindi þessi misserin.
Fyrst stóð Ísavía og Samgöngustofa fyrir stórfelldum skemmdum á Öskjuhlíðinni þannig að nú lítur stórt svæði þar út eins og eyðimörk og svo nú þetta með Heiðmörk. 
Hvort tveggja er undir yfirskini eins konar "öryggis". Flugöryggis í Öskjuhlíðinni þó svo að svæðið, þar sem tré hafa verið fjarlægð, sé miklu stærra en hægt sé að réttlæta það "vegna flugöryggis". Ísavíaeyðimörkin er ekki einu sinni í beinni stefnu við flugbrautina og því algjör óþarfi að fella þetta mörg tré.
Sama virðist vera á ferðinni í Heiðmörk. Yfirskynið er vatnsöryggi en meðalið miklu róttækara en ástæða er til.
Í báðum þessu tilvikum er gengið á sveitarstjórnarvaldið. Bæjarfélögin hér á höfuðborgarsvæðinu virðast ekki hafa neitt um þetta að segja. Annars vegar er það sjálfstjórnarfélag í eigu ríkisins, Isavía, sem gengur fram með þessu offorsi og hins vegar fyrirtæki í eigu Orkuveitunnar, Veitur, sem einhverra hluta vegna þykist eiga vatnsból höfuðborgarsvæðisins og haga sér að eigin geðþótta með þá "eign" sína.
Er ekki kominn tími til að sveitarfélagin á höfuðborgarsvæðinu taki sig saman og hrindi af sér þessa aðför að lögmætum yfirráðum sínum yfir eigin málefnum? Er þau ekki í raun lögvarin?

	Bæjarstjórar efast allir um bílabannið
Ábyrgðarmaður færslu Tilkynna um óviðeigandi tengingu við frétt