Af hverju fegrar Alfreð Finnbogason hlutina svona?

"Já, það er al­veg nýtt hjá mér að spila alla leiki" segir Alfreð. Samkvæmt tölfræðinni er það þó hæpin fullyrðing. Hann fær í mesta lagi örfáar mínútur í hvert sinn ef hann kemur þá inná - og byrjar alltaf á bekknum.
Og það í liði sem er líklega það lélegasta í belgísku a-deildinni og stefnir hraðbyri niður um deild. 

Líkleg ástæða fegrunarinnar er sú að hann sé að réttlæta það fyrir sjálfum sér, og öðrum, að vera valinn í íslenska landsliðið og/eða að betla nokkrar mínútur í næsta landsleik.  

Það er auðvitað stórfurðulegt val og sýnir að landsliðsþjálfarinn er alls ekki starfi sínu vaxinn - hefði reyndar aldrei átt að vera ráðinn.
Fleiri leikmenn eru í liðinu sem eins er ástatt með og Alfreð, svo sem Hjörtur Hermannsson. Hann fær varla nokkrar mínútur með liði sínu í ítölsku b-deildinni, en er samt valin.
Svo eru það markmennirnir. Einn valinn sem er að spila í portúgölsku b-deildinni - og fer engum sögum af - og annar sem var nýlega keyptur til Englands en kemst ekki einu sinni í hóp hjá liði sínu þar.
Eru íslensku fótboltakarlarnir virkilega svona lélegir að það þurfi að velja slíka leikmenn í landsliðið?

Varla. Aðalmarkmaður landsliðins undanfarin ár er í hóp hjá góðu liði en ekki valinn. Þá er gamla brýnið Birkir Bjarnason reglulega að spila með sínu liði og iðulega í byrjunarliðinu, en er ekki valinn. Þórir Helgason er einnig fast í byrjunarliði síns félags en ekki valinn.
Svo fullyrti landsliðsþjálfarinn að Stefán Þórðar væri meiddur og því ekki valinn, en hann hefur samt verið í byrjunarliði síns félags undanfarið og spilað nær allan tíma. Af hverju var Norðmaðurinn að ljúga þessu?
Að lokum má spyrja sig um afstöðu landsliðsþjálfarans til leiksins gegn Ísrael. Fyrst þóttist hann vera á móti því að spila gegn liðinu en svo var hann tvísaga og að lokum segist hann vera meira en fús til að spila leikinn í Ísrael! Leikmennirnir séu jú ekki hermenn! Það er greinilega ekkert að marka þennan mann.


mbl.is Alveg nýtt hjá mér
Tilkynna um óviðeigandi tengingu við frétt

Eldfjallið?

Þessi umfjöllun um gosin, "neyðar"ástandið og "eldfjallið", er komin útfyrir allan þjófabálk. Þetta eru tíð smágos á lítilli sprungu (á jafnsléttu) og ógnar engum nema Grindavíkurbæ og svo Bláa lóninu og Svartsengi, en er þegar farið að hafa áhrif á túrismann. Minnir á Eyjafjallagosið og lokun flugvalla í Evrópu. Hvernig væri nú að draga úr þessari ýktu umfjöllun um gosin svona bara til að bjarga túrismanum og allri þeirri fjárfestingu sem ráðist hefur verið í undanfarið vegna hans, hótel o.fl.?

Er athyglissýki "náttúruvár"sérfræðinganna, jarð- og eldfjallafræðinga, almannavarna, fjölmiðla og Veðurstofunnar næg ástæða til að stjórna fjölmiðlaumræðunni bæði hér og ytra, með stórtjóni fyrir þjóðarbúið?
Og hvað kosta svo öll herlegheitin í kringum varnargarðanna? Ekkert útboð heldur eflaust allt unnið á tímakaupi, vel smurt á eins og venjan er á þessu okurskeri, og allt í boði íhaldsins sem leyfir vinum sínum að komast á ríkisgarðana. Já, hvernig eru þessir verktakar valdir - og hver velur þá?


mbl.is Nálægð við flugvöllinn vekur athygli úti í heimi
Tilkynna um óviðeigandi tengingu við frétt

Þótt fyrr hefði verið

Helgi þessi hefur lengi verið þekktur fyrir rasískar skoðanir, einkum í garð miðausturlandabúa sem iðka íslam. Hann var kosinn formaður Íslensku þjóðfylkingarinnar árið 2016 en var það nú aðeins stutt í það skiptið.
Ekki veit ég hversu lengi hann hefur kennt við Menntaskólann á Laugarvatni, en þeir þar á bæ hafa eflaust lengi vitað af þessum rasista kennandi nemendum við skólann:

https://www.hringbraut.is/frettir-pistlar/helgi-frodufellandi-af-reidi-othverri-hasshausar-og-fordomar/

Gott er þó að vita að skólayfirvöld bregðast við, þó seint sé.
Það er greinilega aukinn rasismi á ferð í íslensku samfélagi, drifinn áfram af Sjálfstæðisflokknum, aðallega formanninum og dómsmálaráðherranum, og nú nýlega tók formaður Samfylkingarinnar undir með þessu liði og kynnti þannig undir útlendingaandúðina. 

Hins vegar stendur mjög sterk grasrót gegn þessu og hefur tekist að vekja athygli á rasisma og hræsni Vesturlanda gagnvart fólki af öðrum kynþætti og annarri trúar en hvítum og kristnum.

Íslensk stjórnvöld eru að átta sig á að ekki er hægt að láta sem ekkert sé og hafa loksins drullast til þess að hjálpa fólkinu á Gaza, sem hefur rétt á dvalarleyfi hér á landi. Sigur Solarissamtakanna og No Borders er stór og því skiljanleg þessi viðbrögð rasistans í þeirra garð.
Nú er bara að fylgja þessu eftir og vinna dómsmálið vegna Eurovision og senda Palestínumanninn geðþekka í úrslitakeppnina í Malmö nú í vor. Svindl RÚV við kosningarnar til að koma í veg fyrir það, er auðvitað til háborinnar skammar.

 

 


mbl.is Kennari lætur af störfum í kjölfar rasískra ummæla
Tilkynna um óviðeigandi tengingu við frétt

Að gera neyðaraðstoð tortryggilega

Mogginn gerir það ekki endasleppt. Reynir að gera sjálfboðaliðastarf til að bjarga fólki frá bráðum dauða, tortryggilegt. Fyrir það fyrsta er söfnunin ekki opinber. Hún fer ekki fram með því að ganga í hús eða á götum úti heldur fer hún fram á netinu.
Þá eru fjölmörg dæmi um þannig safnanir þar sem er verið að safna fyrir einstaklinga, sem þurfa á fjárhagsaðstoð að halda og hefur ekki verið amast við slíku hingað til.

Hér er greinileg enn ein afvegaleiðingin hjá skrílnum sem starfar á Mogganum, auðvitað fyrst og fremst til að bera blak af aumingjunum í ríkisstjórninni, Bjarna Ben og kó, sem þykist vera að hjálpa því fólki á Gaza sem á dvalarleyfi hér á landi en kemst hvorki lönd né strönd með "hjálp" þess opinbera. Sú hjálp er auðvitað einber sýndarmennska enda hefur ekkert komið út úr henni.

Nýjustu fréttir frá Gaza eru þær að um 700 manns er enn á sjúkrahúsi eftir árásir Ísraelshers á sveltandi mannfjölda á Norður-Gaza, þar af 200 manns með skotsár. Yfir 100 manns hafa verið drepnir.
Samkvæmt Mannréttindastofnun Sameinuðu þjóðanna eru morðin á hlaupársdag ekki fyrsta árásin á fólk sem reynir að nálgast hjálpargögn á Gaza. Frá miðjum janúar til loka febrúar hefur Ísraelsher að minnsta kosti gert 14 árásir á mannfjölda sem safnast hefur saman til að taka á móti neyðaraðstoð. Skotið hefur verið á fólkið með sjálfvirkum byssum og kastað að þeim handsprengjum.

Þessar aðferðir Ísraelshers við stríðsreksturinn á Gaza hafa orsakað algjört neyðarástand á svæðinu og verður að rannsaka af óháðum aðilum sem brot á alþjóðarétti segir í tilkynningu frá Mannréttindastofnuninni.
Nú þegar hafa 10 börn látist úr hungri á sjúkrahúsum á Gaza og enn gerir ísraelski flugherinn árásir á flóttamannabúðir á svæðinu. 17 manns voru þannig drepnir í nótt.

Þetta reynir Mogginn að gera lítið úr með því að gera söfnunina til að forða börnum og konum undan þessum drápum tortryggilega.
Skömm blaðsins er mikil, rétt eins og allra þeirra sem ekkert gera til að koma þessu fólki til aðstoðar - heldur þvert á móti senda vopn og skotfæri til Ísraela svo þeir geti haldið morðunum áfram: Danmörk, Holland, Þýskaland, Frakkland, Ástralía, Kanada og svo auðvitað aðalbófinn, Bandaríkin.
Þetta eru bestu "vinir" hægra liðsins hér á landi og því ekki nema von að engrar hjálpar er þaðan að vænta.


mbl.is Leyfislaus söfnun fyrir Palestínu
Tilkynna um óviðeigandi tengingu við frétt

Segir Hamas?

Þetta er all undarleg frétt hjá Mogganum. Gefið er í skyn að það sé ekkert að marka þessa frétt um nýjasta fjöldamorð Ísraelshers á almennum borgurum í Gaza, því fréttin komi frá "heilbrigðisráðuneytinu" sem sé undir stjórn Hamassamtakanna!
Það vill hins vegar svo til að talsmaður Ísraelsstjórnar hefur viðurkennt að hafa skotið á fólkið. Þetta hryðjuverk hersins er svo staðfest af Al Jezeera fréttastofunni, sem verður nú að teljast áreiðanlegur og hlutlaus fréttamiðill.
Þar kemur og fram að a.m.k. 100 manns, eflaust mun fleiri, er alvarlega særður og liggi nú á sjúkrahúsi.
Þá hefur framkvæmdastjóri Sameinuðu þjóðanna, Antonio Guterres, fordæmt fjöldamorðin og krefst tafarlauss vopnahlés.
Mogginn kýs hins vegar að horfa framhjá þessum staðreyndum og reynir að gera þessar fréttir tortryggilegar. Er það ekki í fyrsta sinn sem það gerist þar á bæ.
Þá hefur Öryggisráðið verið kallað saman nú í kvöld vegna þessa hryðjuverks Ísraelshers á óbreyttum borgarum á Gaza.


mbl.is Segja yfir 100 drepna í skotárás Ísraela
Tilkynna um óviðeigandi tengingu við frétt

Hræðsluáróðurinn magnast

Eftir gosið 8. febrúar sl. byrjaði strax hræðsluáróðurinn um að stutt væri í næsta gos á Reykjanesi. 23. febrúar var til dæmis sagt að það gæti gosið í næstu viku miðað við kvikusöfnun. Samt kom fram í annarri frétt um svipað leyti, í þetta sinn frá HÍ, að áætlað væri að uppsöfnuð kvika sé 5 milljónir rúmmetrar en að það þurfi 8-15 milljón rúmmetra til að gjósi á ný. Samkvæmt því gæti nýtt gos dregist til 15. mars en yfirleitt hljómar hræðsluáróðurinn upp á mánaðarmótin næstu.
Nú þegar dregur nær mánaðarmótunum er þetta ítrekað, en Veðurstofan segir hins vegar að það þurfi 8-13 milljónir rúmmetra til að gjósi á ný. Þarna lækkar magnið sem sé um tvær milljónir rúmmetra miðað við tölur frá Háskólanum (þ.e. í hærri magntölunum)! 
Svo sem ekki skrítið. Veðurstofan er miklu duglegri í að hræða fólk en Háskólinn er. Ætli henni sé borgað sérstaklega fyrir það að halda íbúunum hræddum - og burtu frá bænum?
Þá er auðvitað verið að telja fólki trú um að vísindin, og tæknin, séu það nákvæm að þau geti reiknað út hve mikið kvikumagn sé á ferð. Vona að almenningur sé ekki svo auðtrúa.


mbl.is Aukið hættustig: 7,6 milljónir rúmmetra af kviku
Tilkynna um óviðeigandi tengingu við frétt

Alþingismaðurinn og mótmælendur

Birgir Þórarinsson guðfræðingur og alþingismaður, áður fyrir Miðflokkinn en nú fyrir Sjálfstæðisflokkinn, er einn þeirra sem reynir að auka á andúð fávísra öfgamanna á Palestínumönnum og stuðningsmönnum þeirra. Hann skrifaði grein í Moggann í gær, fimmtudag, þar sem koma fram lúalega árásir á mótmælendur og lygar á leiðtoga Palestínumanna, þ.e. Hamas, og er það ekki í fyrsta skipti sem hann lepur upp lygarnar frá hægri öfgamönnum í Ísrael.

Lúalegheit Birgis felast m.a. í því að bera saman fjöldamorðin á Gaza og "flóttamennina" frá Grindavík! Einnig er honum tíðrætt um að leiðtogar Hamas lifi í vel-listingum  í útlöndum en hvetji til fórna almennings á Gaza. Hann nefnir Khaled Mashal sem dæmi, kallar hann miljónamæring sem færir engar fórnir en fórnar löndum sínum í staðinn. Hvergi er vitnað í heimildir fyrir þessu, enda eflaust hrein og klár lygi eins og fleira sem kemur frá þessum fyrrum Miðflokksmanni.

Hið rétta er að Mashal var leiðtogi Hamassamtakanna, sem unnu stórsigur í almennum kosningum í Palestínu árið 2006 og var við stjórnvölin í Gaza til árins 2017. Núverandi leiðtogi Hamas býr á Gaza og deilir með því örlögum þjóðar sinnar.
Af Mashal er það að segja að Ísraelsstjórn hefur margoft reynt að myrða hann - m.a. árið 1997 - og deilir þannig einnig örlögum með löndum sínum. Hann varð leiðtogi Hamas eftir að Ísraelsmenn drápu tvo æðstu forystumenn Hamas árið 2004.
Af dvöl hans í útlöndum er það að segja að hann bjó lengi í Jórdaníu, þ.e. í gömlu Palestínu, þar til konungur Jórdana rak hann og fleiri Palestínumenn úr landi til að þóknast Kananum og af hræðslu við Ísrael. Síðan hefur hann verið landflótta eins og svo margir Palestínumenn. Vinsældir hans og Hamas meðal Gazabúa má fyrst og fremst rekja til þess hve hreyfingin hefur verið dugleg að berjast fyrir réttindum Palestínu og að standa uppí hárinu á fasistastjórninni í Jerúsalem.

https://en.wikipedia.org/wiki/Khaled_Mashal

 


mbl.is Keyrt á mótmælanda fyrir utan Ráðherrabústaðinn
Tilkynna um óviðeigandi tengingu við frétt

Hvað má þá kalla Biden?

Biden er jafnan stórorður í garð þeirra sem hann, og bandarísk stjórnvöld, telja vera sína höfuðandstæðinga, svo stórorðir að þeir sem verða fyrir þessu eru farnir að yppa öxlum. Reyndar reiddust Kínverjar nýlega þegar forseti þeirra var kallaður einræðisherra svo sumum er ekki alveg sama.
En hvað má kalla Biden, sem ber jú höfuðábyrgð á pólitík Kanans nú um stundir? Þeir hafa nú í þrígang beitt neitunarvaldi í Öryggisráði SÞ um tafarlaust vopnahlé á Gaza, nú síðast með einhverjum afsökunum um að þeir séu að vinna að friði. Á sama tíma halda þeir áfram að senda Ísraelum hergögn, svo vel má kalla Biden og kó, fjöldamorðingja þar sem hann (og þeir) er(u) samsekur (sekir) í fjöldamorðunum á Gazaströndinni.
Einnig má benda á málefni blaðamannsins Julian Assange, sem bíður þess að verða framseldur til Bandaríkjanna til að rotna þar í fangelsi ævilangt fyrir það eitt að benda á stríðsglæpi Kanans í Írak á sínum tíma. Því má einnig kalla Biden stríðsglæpamann og sömuleiðis stjórnvöld í Bandaríkjunum. 
Þriðja dæmið eru fangabúðirnar við Guantanamoflóa á Kúbu. Þar eru enn í haldi, án dóms og laga, nokkrir meintir "hryðjuverkamenn", sem hafa sætt pyntingum og öðru harðræði nú í rúm 20 ár, án möguleika á að sleppa þaðan nokkurn tímann. Það eru mannréttindabrot af verstu gerð. 
Sjá https://www.amnesty.org.uk/guantanamo-bay-human-rights

Biden er þannig fjöldamorðingi, stríðsglæpamaður og níðingur, auk þess sem maðurinn er auðvitað fífl sem ætti að hætta að kasta grjóti úr glerhúsi. Sama á auðvitað við um bandarísk stjórnvöld.


mbl.is Biden kallar Pútín brjálaðan tíkarson
Tilkynna um óviðeigandi tengingu við frétt

Sagan af miskunnsama Ísraelanum

Það er óhætt að segja að hægriöfgastjórnin sem nú ræður ríkjum í Ísrael sé trú sínum þjóðar- og trúararfi. Litið er á alla Gazabúa sem Hamasliða og því réttdræpa, einnig konur, börn og gamalmenni. Netanyahu ætlar greinilega ekki að hljóta sömu örlög og Sál konungur sem sagt er frá í Gamla testamentinu (1. Samúelsbók).

Sál var hafnað sem konungi vegna þess að hann óhlýðnaðist boði æðsta prestsins um að drepa alla þjóðina sem herinn hafði unnið sigur á "bæði karla og konur, börn og brjóstmylkinga, naut og sauðfé, úlfalda og asna."
Reyndar fór Sál að mestu eftir þessari skipun frá Guði í gegnum prestinn sinn, framdi fjöldamorð á fólkinu en þyrmdi þó besta búfénaðinum. Þannig kom það til að Davíð varð konungur í Ísrael og ríkið mikla, Zíon, varð til. 
Þetta vilja auðvitað heittrúaðir gyðingar að komi aftur, hið mikla ríki Zíons, hvað sem það kostar - og Netanyahu þorir ekki öðru en að láta að vilja þeirra. Annars gæti það kostað hann lífið rétt eins og gamla Sál.

Um fjöldamorð þessi kvað Hallgrímur Pétursson á sinni tíð í Samúelssálmum sínum:
"far þú nú hratt og hefndir vek,
í hel slá þennan lýð,
menn, kvinnur, fénað til ég tek,
traust fólk sem börnin fríð."

Svo er auðvitað ekki dónalegt að feta í fótspor Davíðs hin mikla Ísraelskonungs:

Davíð herjaði á þjóðir þær,

sem þar í kringum bjuggu nær,

Gesúr og einnig Amalek,

undra mikið því herfang fékk.

 

Kvikfé rænti og klæðum þó,

kvinnur og menn til heljar sló,

lifandi engan lét þar mann

leyna vildi um hernað þann.

...

 

Allt fram að öðru kveldi

frá árla morguns tíð,

fólk Davíðs heiðna felldi,

fullgerðist hefndin stríð

undan ei rann

af þeim lifandi mann ...


mbl.is Ísraelar veita lokafrest vegna Rafah
Tilkynna um óviðeigandi tengingu við frétt

Er verið að ala á fordómum?

Á hinum Norðurlöndun er yfirleitt reynt að forðast það að nefna hvers þjóðar fólk er sem lendir í vandræðum við lögin. Þetta til þess að vera ekki að mata hægra öfgafók og útlendingafóbíu.
Hér á landi er það einnig þannig yfirleitt nema þegar fjölmiðlar tengdir hægri öflunum telja sig hafa ástæðu til að greina frá þjóðerninu - og þá yfirleitt í áróðursskini.
Það er auðvitað augljóst í þessari frétt. Palestínumenn eru bara til vandræða og því á að loka landinu fyrir þeim. Stefna Sjálfstæðisflokksins og Viðreisnar og núna síðast forystu Samfylkingarinnar.
Vesælli fréttamennska er vandfundin.

 


mbl.is Báðir stungumennirnir palestínskir flóttamenn
Tilkynna um óviðeigandi tengingu við frétt

Næsta síða »

Um bloggið

Torfi Kristján Stefánsson

Höfundur

Torfi Kristján Stefánsson
Torfi Kristján Stefánsson
Höfundur er áhugamaður um hina ólíkustu hluti

Færsluflokkar

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (19.3.): 32
  • Sl. sólarhring: 51
  • Sl. viku: 144
  • Frá upphafi: 454693

Annað

  • Innlit í dag: 29
  • Innlit sl. viku: 125
  • Gestir í dag: 29
  • IP-tölur í dag: 29

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband