Auðvitað ekki!

Þetta er auðvitað mjög eðlileg ákvörðun hjá Indriða. Hann er einhver besti miðvörðurinn í norsku úrvalsdeildinni, sá 12. hæsti af öllum leikmönnum deildarinnar í einkunnargjöf blaðsins Verdens Gang, fyrirliði liðs síns sem var í 5. sæti deildarinnar og hokinn af reynslu.

Samt er hann ekki valinn í landsliðið meðan önnur miðvarðarstaðan er í tómu tjóni. Sölvi Geir er án nokkurrar leikæfingar, Kári Árnason er að spila í 3. deildinni ensku og landsliðsþjálfarinn treystir ekki Hallgrími Jónassyni.

Gæti ástæðan verið sú að hinn sænski Lars lætur leikmenn ekki segja sér fyrir verkum hvar þeir eigi að spila? Ari Skúlason veit t.d. að hann verður sendur heim ef hann gerir einhverjar athugasemdir við að spila í vinstri bakvwerðinum en ekki í varnartengiliðnum hægra meginn eins og hann gerir hjá félagsliði sínu.

Svo er auðvitað frægt hvernig Lagerbäck refsar Gunnar Heiðari fyrir það eitt að hafa ekki gefið kost á sér fyrir óralöngu.

Já, það er greinilegt að landsliðsþjálfarinn lítur stórt á sig.

Spilar ekki bakvörð

Heppnissigur!

Jæja, eins gott að sigur vannst! Vörnin slök og miðjan hjálpaði henni lítið. Sérstaklega lá á Birki í hægri bakverðinum og Aron Einar eins og venjulega langt í burtu og hjálpaði Birki ekkert. Nafni hans var sá eini sem sýndi lit. Þrjú dauðafæri hjá vinstri kantmanni Slóvena sýna það best. Þar bjargaði aðeins Hannes í markinu.

Þá var valið á Sölva greinilega rangt og heppni að hann var ekki rekinn út af (eins og gerðist í síðasta leik sem hann lék fyrir landsliðið).

Þá var skiptingin á Alfreð og Jóhanni Berg mjög skrítin, enda sýndi Jóhann Berg ekkert í leiknum.

Einnig var Emil slakur og hefði aldrei átt að byrja inná.

Gylfi Sigurðsson er auðvitað snilldar sparkmaður og á þennan sigur með Hannesi markmanni, þrátt fyrir lélegt val og lélega stjórnun liðsins í leiknum.

Glæsimörk Gylfa tryggðu sigurinn í Ljubljana

Gott hjá Ástu Ragnheiði!

Þetta verður til þess að ákvörðunarvald Reykjavíkurborgar um skipulagsmál á svæðinu færist yfir til Alþingis.

Þar með verður það ekki lengur á valdi borgarinnar að ráðskast með hús eins og gamla Landssímahúsið og heimila þar framkvæmdir sem þrengja mjög að Alþingishúsinu og svæðinu þar í kring.

Vonandi verður þetta frumvarp samþykkt og það sem fyrst.

Hætt er þó við að Framsóknarmenn standi þar í veginum enda er það eiginmaður Jónínu Bjartmars sem á Landsímahúsið. Hann er búinn að vera með græðgisglampann í augunum nú lengi vegna jákvæðrar undirtekta borgarinnar við braskhugmyndum hans. Framsókn sér jú um sína...

Sérskipulagsvald um Alþingissvæði

Fín viðtal við Söru Björk!

Það er fínt viðtal hér við Söru þar sem hún talar þessa líka fína skánsku!:

http://www.sydsvenskan.se/webb-tv/webb-tv-sport/tv-vi-maste-ha-bra-forsvarsspel/

Staðan er annars 2-0 fyrir Lyon í hálfleik. 

Þóra og Sara byrja gegn Evrópumeisturunum

Af hverju er Aron Jóhannsson ekki í liðinu?

Hann er jú byrjaður að leika með varaliði AZ Alkmaar og virðist vera búinn að ná sér eftir meiðsli.

 

 

Eyjólfur valdi þrjá nýliða

Var staðan auglýst?

Merkilegt hvað litlar kröfur eru gerðar til skólastjórnenda á háskólasviðinu hér á landi. Ekki nema von að menntun er öll í lamasessi, ekki síst viðskipta- og hagfræðimenntun.

Mér vitanlega hefur Vilhjálmur Egilsson aldrei starfað við kennslu eða að háskólamálum, en er samt ráðinn sem rektor yfir skóla sem að stórum hluta er rekinn með fjármagni frá ríkinu og þar með skattgreiðendum.

Og það sem meira er. Staðan er ekki einu sinni auglýst! Það hlýtur að vera eindæmi í hinum "siðmenntaða" heimi og minnir á ráðningarmál í einræðisríkjum hér áður fyrr þar sem flokksskírteinið eitt skipti máli. 

Hvað réði þessu annars? Reynsla af atvinnulífinu, sjálfstæðismaður og Evrópusambandssinni. Eitt af þessu eða kannski allt? 

Vilhjálmur verður rektor á Bifröst

Sama gamla sagan

Hann er greinilega ekki mjög nýjungagjarn landsliðsþjálfarinn okkar, Lars Lagerbäck. Hann gerir helst engar breytingar á liðinu ef hann kemst hjá því.

Enn eru snillingar eins og  Jóhann Berg og Sölvi Geir valdir í liðið þó svo að þeir leiki ekkert með liðum sínum (Sölvi) eða sáralítið (Jóhann Berg), sem og Ólafur I. Skúlason sem nær alltaf er varamaður hjá liði sínu.

Menn sem voru valdir í hóp 50 bestu leikmanna norsku úrvalsdeildarinnar eru hins vegar ekki valdir svo dæmi sé tekið af þeim sem ekki eru í liðinu. Indriði Sigurðsson var valinn sá 12. besti og Steinþór Þorsteinsson sá 21. besti.

Þá er Theódór Elmar farinn að leika fast með þriðja besta liði Danmerkur, Randers, og svo auðvitað Gunnar Heiðar sem var næst-markahæsti leikmaðurinn í sænsku deildinni í fyrra, með liðinu sem þar varð í 5. sæti (Norrköping). Guðlaugur Victor er einnig reglulega í byrjunarliðinu hjá NEC sem er í miðri hollensku deildinni (til samanburðar má nefna að lýst hefur verið því yfir að Helgi Valur muni fá lítið að spila hjá AIK í sænsku deildinni sem fer að byrja - en er samt valinn í landsliðið).

Fleiri má nefna sem ég nenni ekki að nefna hér enda búinn að gera það margoft.

Segja má að í liðinu núna eru aðeins fimm manns, sem spila reglulega þessa daganna með félagsliðum sínum - og í alvarlegum deildum. Það eru þeir Ragnar Sigurðsson, Aron Einar Gunnarsson, Gylfi Þór Sigurðsson, Kolbeinn Sigþórsson og Alfreð Finnbogason. Aðeins þessa tel ég vara í landsliðsklassa.

Hinir eru meira og minna varamenn hjá liðum sínum eða að spila í lægri deildum.

Þess vegna verður það að teljast meiriháttar bjartsýni að tala um "góða möguleika" í leiknum gegn Slóvenum. Ég spái öruggu tapi.

Lagerbäck: Góðir möguleikar í Ljubljana

Opið svæði lagt undir byggð?

Ég held að Samfylkingarfólkið hjá borg og ríki ætti nú að geyma brosið aðeins.

Þetta virðist vera opið svæði (mætti alveg vera ljósara hvar þetta er í raun) sem er mikið notað til útivistar og mun skerða lífsgæði þeirra sem þess njóta að miklum mun. 

Samfylkingin er greinilega engu skárri en hinir mið- og hægri flokkarnir sem fórna náttúrunni fyrir smá aur í opinbera kassann en mikinn í vasa verktakanna.

Þessi þétting byggðar í miðju Reykjavíkur er að fara út yfir allan þjófabálk og bitnar á íbúum þeim sem fyrir eru á svæðinu, á umhverfinu og á þeim byggingarstíl og -arfleið sem fyrir er.

Allt í nafni framfaragoðsagnarinnar ... 

Ný 800 íbúða byggð í Skerjafirði

Betri þýðing!

Drottinn, ger þú mig að farvegi friðar þíns,svo að ég færi kærleika þar sem hatur er, fyrirgefningu þar sem móðgun er, einingu þar sem sundrung er, trú þar sem efi er, von þar sem örvænting er, gleði þar sem harmur er, ljós þar sem skuggi er.

Veit þú, Drottinn, að ég sækist fremur eftir að hugga en láta huggast, skilja en njóta skilnings, elska en vera elskaður, því að okkur gefst ef við gefum, við finnum sjálf okkur ef við gleymum okkur sjálfum, okkur fyrirgefst ef við fyrirgefum og fyrir dauðann fæðumst við til eilífs lífs. Amen.

Pétur snæddi með páfa

Hvaða höfuðborg?

Hér í 101 sést varla föl á jörðu eftir nóttina - og ekkert snjóar í þessum skrifuðum orðum.

Er einhver önnur höfuðborg hér á landi eða er verið að tala um einhverja útlenda höfuðborg? 

 

 

Snjó kyngir niður