"þar sem það á við"!

Sjallinn er alltaf fyndinn, það má hann eiga. Hins vegar er spurning hvort þetta sé samt ekki einum of loðið til að vera skemmtiatriði!

Ég fletti upp í bókinni góðu til að athuga hvenær það gæti átt við - og rakst á þetta: "vei yður, þér auðmenn, því að þér hafi tekið út huggun yðar".

Kannski er það þetta eða kannski þessi frægu orð Vídalíns: "Hvað fyrir var Guð þá skyldugur að gera þig ríkan en hann fátækan? Ekki til þess að þú skyldir kappala þinn synduga búk ... heldur til að ... leggja svo mikið af við hann sem Guð krefur, því hann er húsbóndinn"?

Kristin gildi ráði við lagasetningu

Friðrik að missa hæfileikann?

Það var fróðlegt að fylgjast með skákum umferðarinnar á netinu. Friðrik Ólafsson vann snemma peð gegn Daða Ómarssyni en tókst ekki að færa sér það í nyt. Hann gat á einum stað skipt upp á mönnum og haldið yfirburðarstöðu og gerði það ekki. Í hróksendatafli átti hann möguleika á að skipta upp á hrókum (peðsendatafl með peði yfir er nær alltaf unnið en hróksendatöflin ekki) en lét það ógert: http://live.chess.is/2013/rvk13/r5b/tfd.htm

Ég hélt að svona lagað gleymist aldrei (nema auðvitað að Friðrik hafi aldrei kunnað þetta. Hann fékk jú aldrei neina skákhþjálfun á sinni tíð heldur er sjálflærður).

Þá átti Guðmundur Kjartansson mjög slæman dag og tapaði mjög illa (með hvítu): http://live.chess.is/2013/rvk13/r5c/tfd.htm

Sömuleiðis var dagurinn erfiður hjá Þresti Þórhallssyni sem tefldi illa og tapaði örugglega.

Góðu fréttirnar voru þær að Hannes Hlífar tefldi mjög góða sóknarskák og vann með fallegri hróks- og riddarafórn. Vonandi er hann að ná sér á strik eftir mörg mögur ár undanfarið.

 

Sjö stórmeistarar eru efstir

Feitur biti þar á ferð!

Það yrði stór veiði í Árbænum ef þessi biti á krókinn. Hann hefur getið sér mjög gott orð ytra og lið hans er eitt það besta í næstefstudeildinni sænsku.

Merkilegt að Frammarar skuli missa af honum ....

Íslenski boltinn gæti verið spennandi í sumar með alla þessa atvinnumenn á heimleið.

Heiðar Geir í Árbæinn?

Ekki lengi að því sem lítið er!

Matvælastofnun er greinilega mjög merkilegt fyrirbæri. Fyrst þegar heyrðist af hrossakjötshneykslinu í Evrópu þá var í fjölmiðlum tekið viðtal við einhvern yfirmanninn þar sem sagði að stofnunin ætlaði ekkert að gera í málinu. Það væri ekki heilbrigðismál heldur neytendamál!

Síðan varð pressan of mikil svo þeir hundskuðust til að láta rannsaka unnar kjötvörur, merktar sem nautakjöt, til að athgua hvort þær innihéldu hrossakjöt (hrossum hefur jú verið slátrað unnvörpum hér á landi undanfarið vegna erfiðs tíðarfars og lítill heyja).

Þessi rannsókn tók ekki langan tíma, eða aðeins viku! Sambærilegar rannsóknir erlendis taka mun lengri tíma og standa enn yfir þó svo að byrjað hafi verið á þeim mun fyrr en hér á landi.

Það vekur spurningar um aðferðina sem notuð er hér á landi. Varla er það DNA-rannsókn því hingað til hefur þurft að senda sýni til slíkrar rannsóknar til útlanda (Noregs og Danmerkur) og tekið marga mánuði í sumum tilfellum.

Því trúi ég og treysti þessari "rannsókn" Matvælastofnunar mjög svo takmarkað - og er hræddur um að þarna sé um einhvern kattarþott að ræða. Þetta er jú ekki heilbigðismál (hrossakjöt er nefnilega ekkert hættulegt), aðeins neytendamál!

Hross ekki notað í stað nauts

Miklu skárra en ...

Þessi tillaga er miklu skárri en sú fyrri, svo sem að sleppa því að byggja á Ingólfstorgi. Þó er hún enn meingölluð. Fyrir það fyrsta er byggingarnar alltof margar og stórar þannig að aðkoma að þeim verður mjög erfið (svo ekki sé talað um skuggann af þeim). Einnig er mjög þrengt að Fógetagarðinum sem virðist fyrst og fremst ætla að verða aðkoma fyrir hótelgesti. Svo fer NASA auðvitað sem menn er enn alls ekki sáttir við.

Svo má nefna eina af þremur myndunum sem birtist með þessari frétt, þeirri nr. 3. Textinn er: "Horft yfir Kvosina til suðurs. Á þessari mynd sést einkar vel hvernig nýbyggingarnar munu líta út við torgin þrjú."

Þegar myndin er skoðuð sést aðeins eitt torg (þ.e. Fógetagarðurinn) og myndin er alls ekki tekinn í suður heldur í austur. Hún sýnir reyndar vel hvað Landsímahúsið gamla verður mikið skrímsli við þessar breytingar. Ekki bæta svo fyrirhugaðar byggingar á "alþingisreitnum" úr skák. Þarna verður skuggi allan daginn og Fógetagarðurinn gjörsamlega eyðilagður þar með.

Breytt skipulag Landsímareits

Betra lið eða lélegra?

Það er spurning hvort að Eyjólfur sé með þessu á uppleið eða niðurleið. Í fyrra var sagt að hann væri besta söluvara Sönderyske en það lið er þekkt fyrir að græða vel á sölu leikmanna. Þá var haldið að hann færi til Belgíu, rétt eins og Olafur Ingi Skúlason, og ætti framtíð fyrir sér þar í mun betri deild en þeirri dönsku.

En svo varð ekki. Midtjylland er lið í hörku fallbaráttu í dönsku úrvalsdeildinni og er reyndar líklegra til að falla en Söndejyske sem einnig er í sama slagnum. Þetta gæti þýtt að enn einn Íslendingurinn falli um deild og spili með lægrideildarliði á næstu leiktíð.

Það er reyndar að æra óstöðugan að nefna nöfn: Jóhann Berg með AZ Alkmaar, Alfreð Finnbogason með Heerenveen, Birkir Bjarnason með Pescara, Björn Bergmann með Wolves og jafnvel Hallgrímur Jónasson með Sönderyske (ef Midtjylland fellur ekki). Arnar Þór Viðarsson leikur svo örugglega í næstefstu deild í Belgíu að ári ef hann hættir þá ekki.

Þá spila menn eins og Emil Hallfreðarson og Ari Freyr Skúlason með liðum í næstefstu deild, sem og Davíð Þór Viðarsson (sem gæti reyndar verið á leið upp með liði sínu Vejle). Svo er auðvitað fyrirliðinn ástsæli, Aron Einar Gunnarsson, að spila í næst efstu deidinni á Englandi og gæti verið þar áfram því eitthvað er sigurmaskína Cardiff að bila þessa dagana.

Eyjólfur er leikmaður sem okkur hefur vantað

Þröstur Jóhanna og Jón Gnarr?

Eitthvað hefur nú blaðamanni Moggans brugðist bogalistin í þessari frétt!

Amk er nöfn íslensku stórmeistaranna nokkuð sérkennileg (og ókunnugleg, amk á skáksviðinu). Þröstur Jóhanna er  allavegana óþekktur stórmeistari og ekki víst að mannanafnanefnd samþykki þetta nafn. Þá er nafnið Jón Gnarr Þórhallsson nokkuð grunsamlega af skákmanni að vera.

Ætli blaðamaðurinn hafi kannski eitthvað ruglast þarna? 

Íslendingarnir byrja vel

Rúv með frábæra frétt um þetta!

Snillingarnir á Rúv eru með frábæra frétt um þetta. Yfirskriftin er t.d. óviðjafnanleg: "Reyndu að stela úlpu með sprautunál."

Annað gullkorn er í frétt RÚV: "fyrir að hafa reynt að stela 66 gráðu úlpu"! Hvernig ætli 66 gráðu úlpa líti út?:

http://ruv.is/frett/reyndu-ad-stela-ulpu-med-sprautunal

Ógnuðu stúlku með sprautunál

Hvernig er eiginlega með sóknarlínu landsliðsins?

Ástandið er að verða mjög slæmt fyrir landsliðið hvað sóknarliðið varðar. Kolbeinn Sigþórsson fær lítið að spila með Ajax eftir að hafa jafnað sig á meiðslunum. Þá er Alfreð Finnbogason að spila með liði í harðri fallbaráttu í hollensku deildinni og var tekinn útaf í hálfleik í síðasta leik. Birkir er mikið á bekknum hjá Pescara í ítölsku deildinni, liði sem nær örugglega fellur um deild. Þá er Eiður Smári ekki að spila fast í belgísku deildinni.

Svo getur verið að báðir þeir Birkir og Alfreð muni spila í næstefstu deild á næstu leiktíð – og Birkir nær örugglega. Fer þá að verða hæpið að velja þá í landsliðið en eins og kunnugt þá verða amk tveir aðrir landsliðsmenn að spila í næstuefstu deild á næstu leiktíð, þeir Emil Hallfreðsson (sem er þar a.m.k. núna) og Ari Freyr Skúlason.
Þá má nefna Björn Bergmann, sem reyndar gefur ekki kost á sér í landsliðið eins og er, hann gæti verið að spila í þriðju deildinni á England á næstu leiktíð. Einnig má nefna Aron Jóhannsson sem enn er meiddur og nær líklega ekkert að spila með nýju liði sínu, AZ Alkmaar, á þessu tímabili. Hann gæti m.a.s. átt það á hættu að liðið sé þá fallið um deild (sem og liðsfélagi hans Jóhann Berg) því staða þess er ekki góð eins og er.

Við erum greinilega að lenda í erfiðleikum með val á landsliðinu. Það er merkilegt í ljósi þess að fyrir aðeins einu ári síðan var mikið talað um efniviðinn sem við ættum – og þökkuðu menn því stórbættri þjálfunar- og keppnisaðstöðu með öllum þeim fótboltahöllum sem reistar hafa verið undanfarað. En það er því miður oft svo að með betri aðstæðum og meiri stuðningi þá versnar árangurinn. Skákin er gott dæmi um það. Þegar stórmeistaranir komust á laun frá ríkinu hættu þeir að nenna að tefla og eru núna langt frá því að vera samkeppnishæfir við þá bestu. Sama virðist vera að gerast í fótboltanum. Ofdekrið virðist þannig leiða til þess að menn verði væru­kærir og latir – og vilja fá allt upp í hendurnar. Það á reyndar við á fleiri sviðum mannlífsins. Já, það var betra hér áður fyrr, er menn hertust við erfiðar aðstæður og urðu þrautseigir með afbrigðum! Heimur vernandi fer...

Aron og Björn í eldlínunni

Vænn bitlingur í nokkur ár í viðbót?

Ljóst er að hinn gæðumprýddi aðalsamningamaður okkar Íslendinga (les Samfylkingarinnar) í aðildarviðræðunum við ESB, sér fram á að geta treint sér vinnuna allavega fram til 2015. Ekki veit ég alveg hvað maðurinn er með í kaup, en það hlýtur að vera dágóður skildingur (álagsgreiðslur vænar vegna þess hve erfitt er að búa í útlöndum osfrv).

Ekki veit ég heldur nákvæmlega hvað þessar samningaviðræður kosta, en miðað við hvernig stjórnarandstaðan lætur þá er það engin smáupphæð.

Svo við skattgreiðendur getum einnig látið okkur hlakka til - við að sjá peningana okkar renna í þessa saminga-hít til þess eins að láta enn meira af hendi rakna til ESB ef af aðild verður.

Já, einnig við getum glaðst af tilhugsuninni. 

Komin langt á veg vorið 2015?