Meira til hægri en gamla stjórnin?

Lýsingin í frétt Moggans um áhrif Viðreisnar í Valkyrjustjórninni er auðvitað hárrétt. Þorgerður Katrín "varnarmálaráðherra" ræður greinilega öllu í ríkisstjórninni og kemst upp með allt. Einna mest áberandi er það að hún tekur upp á sitt einsdæmi að gefa línuna í utanríkismálum, meðal annars með yfirlýsingum um að standa fast við bakið á "vinum" okkar fyrir vestan, þ.e. Kananum (jafnvel í málefnum Palestínu?), boðar stóraukin framlög til "varnar"mála og leyfir gífurlega aukin umsvif Bandaríkjahers hér á landi. Þetta er reyndar einfaldlega í beinu framhaldi af stefnu Sjálfstæðisflokksins og fyrirverandi utanríkisráðherra, hauknum og stríðsæsingamanneskunni Þórdísi Reykfjörð.

Þetta skýtur þó nokkuð skökku við stjórnarsáttmálann því þar er ekkert rætt um þessi "varnar"mál fyrr en í síðustu greininni, þeirri 23. Þar er meira að segja mjög vægt til orða komist. Þar segir t.d. aðeins að "mótuð verði öryggis- og varnarmálastefna".
Svo virðist sem að Þorgerður Katrín hafi upp á sitt einsdæmi mótað stefnuna og það þegar á fyrstu dögum hennar á ráðherrastóli. Ekki heyrist þó hljóð úr horni samstarfsflokkanna hvað þetta varðar sem hlýtur að teljast einkennilegt, allavega af hálfu forsætisráðherrans sem manni finnst að ætti að hafa forystu í svo mikilvægum málaflokki.
Þó svo að Þórdís Kolbrún hafi verið yfirlýsingarglöð í embætti þá virðist sem VG og Katrín fyrrum forsætisráðherra hafi tekist að halda aftur af henni að ákveðnu marki.
Því er ekki að heilsa nú, svo óhætt er að fullyrða að nýja stjórnin sé hægra megin við þá gömlu, allavega í utanríkismálum.
Hér kemur svo upphaf 23. greinar stjórnarsáttmálans:
"Með utanríkisstefnu sem byggir á mannréttindum, friði, virðingu fyrir alþjóðalögum og náinni samvinnu við Evrópusambandið, önnur norræn ríki og Atlantshafsbandalagið. Mótuð verður öryggis- og varnarmálastefna."

Valkyrjur koma og fara

Gallabuxur eða bara slakur árangur?

Carlsen er jú þekktur fyrir að vera fýlupúki og sver sig þar í ætt við Kasparov gamla og fleiri slík "stórmenni" skákarinnar. En líklega voru það ekki aðeins gallabuxurnar og sérkröfur "meistarans" sem gerði það að verkum að hann hætti í atskáksmótinu heldur slök frammistaða. Hann hafi einfaldlega farið í fýlu vegna þess hversu illa honum gekk í mótinu. Fimm vinningar af átta mögulegum og 64. sætið var eitthvað sem hann, og flestir aðrir, gerði sér vonir um. Enda var hann ríkjandi heimsmeistari með þessum tímamörkum.
Auðvitað greip Carlsen tækifærið þegar það gafst og bar allt öðru við. Það gera nefnilega allir "snillingar". 

Neitaði að skipta um buxur og hætti keppni

Einlæg ást og eindrægni!

Eins og sést á þessari mynd er Sjálfstæðisflokkurinn ekkert svo óánægður með að afhenda Viðreisn lyklavöldin. Viðreisn er jú klofningaflokkur úr íhaldinu og það er alls ekki langt á milli þessara flokka.
Spekingarnir eru að spá harðri stjórnarandstöðu en hún verður það varla frá Sjöllunum, nema svona til málamynda. Myndin sem birtist með fréttinni segir meira en mörg orð þar um!
Svo er faðir Þorbjargar dyggur íhaldsmaður af Nesinu en það er þó smá kratablóð í móðurættinni. Þar eru og einnig tengsl við Suðurlandið því móðir Tobbu, eins og hún var kölluð sem krakki og kannski enn, er frá Selfossi.
Tveir Sunnlendingar að faðmast! Getur eitthvað gott komið þaðan?

Lyklaskipti: „Íhaldskonan er með alvöru lykil“

Áfram haukur í utanríkisráðuneytinu

Það er ekki nema von að Þórdís Kolbrún gleðjist yfir því að Þorgerður Katrín verði utanríkisráðherra. Þar er sami skítur undir sama skó. Með Viðreisn í nýju ríkisstjórninni verður auðvitað áfram tekið þátt í hernaðargeðveikinni í Úkraínu með hinum NATÓ-þjóðunum, sem mun kosta ríkiskassann stórar upphæðir.
Sama má segja um nýja fjármálaráðherrann, huldumanninn Daða M. Kristófersson. Valið á honum sýnir í raun hver er stefna Viðreisnar innan ríkisstjórnarinnar. Hann vill endilega ganga í ESB og taka upp evruna. Sem sé ekta kapitalisti og sem slíkur styður hann hernað ESB og NATÓ í Úkraínu. Þetta er þannig félegur hópur.
Bjarni Ben reynir að sjálfsögðu að breiða yfir þetta með því að þykjast vera harður andstæðingur "Sólstöðu"stjórnarinnar og heldur því m.a. fram að Flokkur fólksins hafi náð fram flestum sínum stefnumálum.
Það er auðvitað blekkingarleikur. Viðreisnin er sigurvegarinn í þessari stjórnarmyndun, enda er Þorgerður Katrín vel sjóuð í hráskinnsleiknum. Hún er auðvitað ennþá Sjálfstæðismaður og þannig er sá flokkur enn við völd, aðeins undir öðru nafni.
Já, það er lítilla breytinga að vænta.

 

Gott að fá Þorgerði í ráðuneytið

Enn eitt okrið

Ástæðan fyrir þessari hækkun er einföld. Ríkisstjórnin fráfarandi með Guðlaug Þór í fararbroddi stofnaði til skrifstofu "út í bæ" eins og garðyrkjubændur benda á, og þar með hækkaði raforkuverð um tugi prósenta. Nánar tiltekið er ástæða hækkunarinnar sú að á næstu árum megi búast við orkuskorti í landinu. Þessi mikla hækkun er þannig ekki tilkomin vegna þess að í dag hefur orðið þetta mikið dýrara að framleiða raforkuna, heldur vegna þess að í framtíðinni mun verða meiri eftirspurn eftir henni! Gróði orkusölufyrirtækjanna mun með þessu stóraukast strax í dag með tilkomu þessarar skrifstofu úti í bæ, eða þessa "viðskiptavettvangs" sem forstjóri Landsvirkjunnar kýs að kalla króann:
https://www.visir.is/g/20242664920d/ekki-benda-a-mig-segir-for-stjori-lands-virkjunar

Svo leyfa sumir fjölmiðlar að tala um kosti þessa fyrirkomulags, "kosti" sem í raun felast ofur einfaldlega í því að kostnaðurinn við þetta lendir á hinum almenna notenda, þ.e. heimilunum, en orkufyrirtækin og milliliðurinn græða.
Já, Sjálfstæðisflokkurinn sér um sig og sína eins og venjulega en vonandi erum við laus við hann í náinni framtíð. Hins vegar er þess varla að vænta að ný ríkisstjórn breyti þessu því bæði Samfylking og Viðreisn virðast aðhyllast svipaða stefnu, það er að auka raforkuframleiðslu með vindmyllum sem mun þýða enn hærra raforkuverð til heimilanna. Það er nefnilega miklu dýrara að framleiða raforku með vindmyllum en með vatns- eða gufuvirkjunum.

Verð á raforku hækkað um allt að 37% á einu ári

Árskógarmálið

Nýjasta vendingin í Árskógarmálinu er sú að formaður umhverfis- og skipulagsráðs Reykjavíkurborgar, píratinn Dóra B. Guðjónsdóttir, reynir að koma sökinni yfir á Búseta. Þeir hafi fært byggingu blokkarinnar 10 metra nær lóðarmörkum en deiliskipulagið nær til. Spurning hvort þetta sé ekki lygi til að komast hjá skaðabótum á hendur borginni. Allavega þarf samt byggingarfulltrúi borgarinnar að samþykkja slíka breytingu ef rétt er með farið. Reyndar virðist sá aðili hafa sofið ansi oft þegar útfærslu á byggingum í borginni varðar. Um það eru mörg dæmi. Báðir aðilar virðast þannig vera sökudólgar í málinu.
En ef þessi Moggafrétt er rétt þá virðist tilraun Dóru til að frýja borginni ábyrgð ekki ætla að takast hjá henni:

https://www.visir.is/g/20242663500d/-mer-finnst-thetta-bara-omur-legt-

Íbúar segjast varnarlausir

"uppreisnarmenn" eða terroristar?

Merkilegur þessi fréttaflutningur frá Sýrlandi. Vestrænir fjölmiðlar þykjast að venju flytja hlutlausar fréttir en það er ljóst að áður stimpuð hryðjuverkasamtök eru allt í einu orðin uppreisnarmenn þar á bæ, vegna þess að þau beinast gegn "réttum" aðilum. 
Áður hefur verið sagt að Tyrkir styðji þetta lið en í glænýrri yfirlýsingu taka þeir undir með Katar, Sádi-Arabíu, Jórdaníu, Egyptalandi, Írak, Íran og Rússlandi um að átökin fyrir botni Miðjarðarhafs, og þessi sókn "uppreisnarmanna", ógni ekki aðeins stöðugleika á þessu svæði heldur einnig á heimsvísu.
Einu aðilarnir sem virðast styðja þetta lið og útvega þeim vopn eru þannig Ísrael og Bandríkin - og svo auðvitað vestrænir fjölmiðlar með sínar "hlutlausu" fréttir. Spurning einnig með ESB.
Er ekki með þessu verið að stofna til þriðju heimstyrjaldarinnar með vopnasendingum til "terrorista" sem nýtast nú vel fyrir Kanann og fleiri? Að færa stríðsátök út á sem flestum svæðum og skiptir engu máli með hvaða meðölum það er gert?

Segja öflugar varnir umhverfis Damaskus