Frammistaða Íslendinga

Eins og ég benti á annars staðar þá er það aðeins Hannes einn Íslendinga sem er að standa sig á Reykjavíkurskákmótinu í ár þó það sé líklega það veikasta sem haldið hefur verið hér á landi. Enginn ofurstórmeistari er með og aðeins fimm skákmenn yfir 2600 stig.

Samt hefur Íslendingum gengið illa á mótinu, öllum nema Hannesi. Núna í næstsíðustu umferðinni töpuðu flestir þeirra, sem voru að berjast í efri hlutanum, nema þeir væru að keppa hver við annan.

Hannes er í fyrsta til öðru sæti fyrir síðustu umferð með 6,5 v. Næstur´"Íslendinganna" er Daninn Henrik Daníelsen í 18. sæti með 5 v, en Jón V. Gunnarsson og Bragi Þorfinnsson eru í 23. og 24. sæti einnig með 5 vinninga. Þá er ungi strákurinn Hjörvar Steinn Grétarsson í 27. sæti með jafn marga vinninga. Hann virðist enn eiga langt í land til að ná frambærilegum árangri á alþjóðavísu, og er varla að vinna nein stig á þessu móti.

Benda má að ungu strákarnir eins og Dagur Arngrímsson og Guðmundur Kjartansson, sem er nú kominir yfir tvítugt og ættu að vera komnir á toppinn hér á landi, eru að tapa stigum. Dagur er nr. 34 og er að tapa fimm stigum en Guðmundur er 38. og er að tapa svipað af stigum. Þá er stórmeistarinn Þröstur Þórhallsson aðeins í 41. sæti, en mun samt vera á fullum launum til að stunda skákina.

Einnig eru skákmenn eins og Björn Þorfinnsson, Ingvar Þór Jóhannesson og Sigurbjörn Björnsson að tapa stigum, og einnig Guðmundur Gíslason en menn bundu vonir við að hann gæti náð áfanga að alþjóðlegum meistaratitli á mótinu.

Mót þetta er þannig enn eitt dæmið um að Íslendingar eru að dragast aftur úr á skáksviðinu og engir ungir skákmenn að koma upp sem gæti endurreist merki fjórmenninganna sem komu Íslandi upp í 5. sæti á Ólympíuleikjunum í skák á 10. áratugnum.

Sorglegt ekki síst í ljósi þess að aldrei hefur verið gert eins mikið af hálfu stjórnvalda til eflingar skákinni, með stórmeistarlausnum, styrkjum til Skáksambandsins, reksturs Skákskólans og reksturs borgarinnar á Skákakademíunni. Svo virðist sem stjórnarkreppa ríki í skákhreyfingunni sem gerir það að verkum að ekkert verður úr þessum mikla stuðningi.

Hannes með sterka stöðu