Stórleikur dagsins!

2.7.2010 | 11:34

Leikur Brasilíu og Hollands verður annar af aðalleikjum 8 liða úrslitanna. Hinn er leikur Þýskalands og Argentínu. Nú um helgina falla þannig tvö af sigurstranglegustu liðinum úr keppninni!

Sparkspekingar hafa verið að benda á að Hollendingar hafi verið að breyta um leikstíl undanfarið, byggi meira á vörn en sókn. Reyndar á það sama við um Brasilíu en það hefur verið vitað mun lengur.

Þá hafa Hollendingar átt í erfiðleikum með móralinn í liðinu. Mikið hefur verið rætt um það þegar van Persie var tekinn út á í leiknum gegn Slóvakíu og kvartaði yfir því við þjálfarann, vildi frekar að Sneijder hefði verið tekinn út af. Því er spurning hvort Klaas-Jan Huntelaar byrji ekki inn á en Persie byrji á bekknum.

Lykilmaður hjá Brasilíu er miðvörðurinn Lucio sem nú getur fengið uppreisn æru eftir að vera seldur frá Bayern Munchen í fyrra. Hann hefur reyndar þegar fengið hana með því að vinna meistaradeildina í ár með Inter, á móti Bayern, en mun eflaust finnast það sætt að hefna sín enn betur á hollenska þjálfara þýska liðsins með því að vinna einnig hollenska landsliðið.

Liðið sem vinnur ætti að eiga greiða leið í úrslitaleikinn.