Ótrúlegt ef satt er!

Þetta eru ótrúlegar fréttir ef sannar eru. Hermann hefur ekki spilað fótbolta í hálft ár og á nú að fara að spila með landsliðinu gegn einhverju sterkasta landsliði í heimi!!!

Og rökstuðningurinn er sprenghlægilegur. Ef varalið næstuefstudeildarliðsins Portsmouth væri til þá væri Hermann búinn að spila með því og þar með líklega kominn í nægilega góða leikæfingu til að spila gegn HM-liði Portugals! Tekið skal fram að maðurinn kemst ekki einu sinni á bekkinn hjá Portsmouth sem þó er í neðstu sætunum í sinni deild.

Ef þetta er rétt þá held ég nú að landsliðsþjálfarinn hafi endanlega spilað rassinn úr buxunum og hljóti að fá sparkið eftir landsleikinn.

Eina manninn sem vantar í vörn landsliðsins frá tapleikjunum tveimur í september er Sölvi Ottesen. Á bekknum hefur setið Ragnar Sigurðsson sem spilar alla leiki með Gautaborg og stendur sig alltaf prýðisvel. Hann er alls ekki síðri varnarmaður en Sölvi.

Af hverju er ekki hægt að treysta á hann í þessum leik? Svo er Indriði vanur að spila í miðju varnarinnar í sínu félagsliði svo hann gæti nýst þar ef einhver meiðsli verða.

Hermann í landsliðshópnum gegn Portúgal

Athugasemdir

[Gummi (IP-tala skráð) 4.10.2010 kl. 11:50]

Hvernig er það, var Eiður Smári nokkuð valinn í síðasta hóp vegna þess að hann var ekki að spila?

[Gummi (IP-tala skráð) 4.10.2010 kl. 11:52]

Hermann er reyndar ekki með samning við Portsmouth og getur því ekki spilað með þeim.

Annars er Sölvi búinn að vera skelfilegur, átti í báðum mörkunum á móti Noreg og ég var að vona að Ragnar myndi fá tækifærið núna, annars er Hermann í allt öðrum klassa en þeir tveir og því ekki skrítið að hann sé kallaður til, grunar þó að hann verði ekki í byrjunarliðinu.

[Torfi Stefánsson (IP-tala skráð) 4.10.2010 kl. 12:55]

Já, einmitt. Eiður ekki valinn (undir því yfirskini) að hann væri ekki í leikformi, en nú er Hermann valinn í liðið án þess að hafa nokkuð spilað í hálft ár og ekki með landsliði í u.þ.b. ár! Ólafur er alltaf sjálfum sér samkvæmur.

Þá er athyglisvert hvernig klíkan í kringum Óla Jó. lætur núna (sparkfréttamennirnir). Landsliðið vængbrotið vegna þess að 21 árs liðið hefur forgang, og fimm fastamenn í landsliðinu ekki með þess vegna!!!!

Það rétta er að aðeins einn þeirra sem valinn var í 21 árs liðið hefur leikið meira en 10 landsleiki (Aron Einar með 20 leiki). Hinir allir eru nýbyrjaðir í liðinu (og hafa svo sem leikið allt of mikið eins og Jóhann Berg).

Segja má þvert á móti að nú eigum við loksins kost á A-liði með því að Ólafi var settur stóllinn fyrir dyrnar í tilraunakenndu vali sínu. Eiður kemur nú inn sem og Theódór Elmar en Elmar hefur leikið alla leiki með Gautaborg undanfarið.

Liðið getur ekki annað en styrkst við þetta (og svo hefur hinn illa einfætti  Hermann aldrei getað neitt!).

[Kári (IP-tala skráð) 4.10.2010 kl. 15:03]

Landsliðsval er alltaf mikið limbó, að reyna að velja hóp sem samanstendur af einhverri reynslu og leikmönnum sem eru að spila reglulega. Það er ekki sjálfgefið að Ísland eigi leikmenn í hverja stöðu sem spila reglulega. Meira segja 'stærri' landslið eiga í þessum erfiðleikum, t.d. Danir. Varnarmenn, eins og Hermann, komast langt á rútínunni, og geta verið gulls ígildi, þrátt fyrir að vera ekki leikhæfingu. Og þeir sem þekkja til Hermanns þurfa varla að efast um að myndi gefa allt sem hann á í þennan leik, einfættur eða ei. En það er langt frá því sjálfgefið að hann sé í byrjunarliði. Sóknarmenn missa hins vegar snerpu ef þeir eru ekki leikhæfingu og það á við um Eið, ef einhver hefur séð innáskiptingarnar hans hjá Stoke. Ég er samt nokkuð viss að ástæðan fyrir því að hann var ekki valinn seinast var óvissan um framtíð hans og þetta var rétt fyrir félagskiptagluggann.

Mér finnst ekki valið vera tilraunakennt undir það seinasta; Gylfi, Rúrik, Kolbeinn, Jóhann, Birkir og miðjuparið Aron og Eggert spila allir regulega á frekar háu levelli. Þrátt fyrir fáa A-landsleiki þekkja þeir vel inn á hvorn annan, frá yngri landsliðum og það er þessi samhæfni sem er mikilvæg þegar að landsliðið hittist bara nokkrum sinnum á ári. Það tekur tíma að byggja upp, þeir eru ungir, verða bara betri og með heppni (ef þeir halda áfram að spila reglulega og detta ekki í slæm meiðsli) getur íslenska landsliðið orðið massalið.

Ég get ekki séð hvernig liðið styrkist við þetta, skref aftur í uppbyggingu og þá sérstaklega er miðjan veik ef Aron og Eggert spila ekki.