Af hverju Nató?

Ef af því verður að NATO taki yfir stjórn hernaðaraðgerðanna gegn stjórnvöldum í Libýu, þá þýðir það grundvallarbreytingar á starfsreglum samtakanna.
Innrás NATO-ríkjanna í Afganistan á sínum tíma var réttlætt með því að vísa til ákvæðis í lögum sambandsins um að árás á eitt ríki þess jafngildi árás á þau öll.
Vegna árásanna á tvíburaturnana í New York, sem voru skipulagðar í Afganistan en ekki af stjórnvöldum þar, sem sé árás á eitt af löndum samtakanna, þá þótti réttlætanlegt að ráðast inn í Afganistan.

Nú er því sama alls ekki til að dreifa. Libýa hefur ekki gert árás á einn eða neinn, og þannig auðvitað alls ekki á neitt aðildarlanda NATO.
Þátttaka NATO ríkjanna í stríðinu gegn Libýu þýðir þannig brot á stofnskrá NATO eða mildara sagt, að verið sé að sveigja reglur sambandsins.
NATO er þannig ekki lengur "varnarbandalag" heldur eins konar lögregla allra jarðarbúa.

Mikill ágreiningur hefur verið meðal NATO-ráðsins undanfarna daga og gengið á ýmsu. Frakkar voru harðlega gagnrýndir fyrir að leika einhver einkalögguleik þegar þeir gerðu árás á þjóðveginn til Benghasi á fyrsta degi stríðsins - og sprengdu þar meðal annars upp sjúkrabíl og drápu alla sem í honum voru.
Þá voru Þjóðverjar gagnrýndir fyrir að vilja ekki taka þátt í stríðsleiknum með hinum strákunum.
Tyrkir voru og til að byrja með á móti allri íhlutun í borgarastyrjöldina í Libýu en virðast nú vera komnir á aðra skoðun (eftir símtal Obama við tyrkneska forsætisráðherrann, já svona gerast kaupin á eyrinni).

Af öllu þessu er ljóst að eðli Nató hefur breyst - og stór spurning hvað vopnlaus þjóð eins og við Íslendingar hefur að gera í þessum árásarsamtökum lengur.

Þá er og ljóst að hernaðaraðgerðirnar gegn Libýu munu kosta skildinginn og að aðildarlönd NATO muni þurfa að borga brúsann. Erum við, næstum gjaldþrota ríki, tilbúin til þess?
Tekið skal fram að öll 28 ríki sambandsins verða að greiða þessum tillögum atkvæði til að þær verði að veruleika.
Er ríkisstjórn Íslands tilbúin til þess - og hefur verið einhver umræða á þingu, eða í flokkunum, um það mál?
Og eru t.d. Vinstri grænir tilbúnir til að leggja blessun sína yfir árásirnar á Libýu - og taka þannig þátt í stríðsátökum í fyrsta sinn í sögu sósíalistísks flokks á Íslandi? Eða er VG kannski ekki sósíalistískur vinstri flokkur lengur?

Vinna að samkomulagi um að Nató taki við

Athugasemdir

[Loki (IP-tala skráð) 23.3.2011 kl. 14:25]

Er ekki rétt munað hjá mér að eftir að Clinton réðist á Bostníu (var það ekki 95) til að stoppa þjóðarmorð, tók ekki NATO yfir eftir það og ef svo er, þá verður þetta ekki í fyrsta sinn.

Afhverju tekur Arababandalagið ekki yfir í Libýu? Væri það ekki það besta ? Þeir báðu um þetta og svo mótmæltu þeir eftir að þetta fór af stað.