"Í rénum"?

Magnúsi Túma Guðmundssyni jarðfræðingi hefur verið tíðrætt um það að gosið sé í rénum, og það strax eftir að það hófst (og hefur ríghaldið í þessa fullyrðingu síðan).
Ég hef alltaf skilið þetta hugtak "í rénum" sem svo að eitthvað væri að hætta, fjara út - og er nær fullviss um að það sé réttur skilningur.

Nú eru tveir sólarhringar liðnir frá upphafi gossins og ekkert virðist benda til þess að það sé "í rénum"!
A.m.k. tel ég víst að íbúar á Klaustri og þar í kring geti ekki tekið undir slíkt.

Þá hefur sérfræðingunum verið tíðrætt um það að gosið standi aðeins í nokkra daga - í það minnsta öskufallið.
Magnús Tumi, hinn margumræddi, fullyrðir þetta meðal annars og heldur því fram að gosið 1873, sem á að hafa verið víðlíka stórt og þetta, hafi ekki staðið nema í nokkra daga.

Það er reyndar merkilegt með það gos að hvergi er að finna upplýsingar um það. Væri róðlegt að vita hvaðan Magnús Tumi hafi þessar upplýsingar.
Hann virðist ennfremur vera einn um þær því Páll Einarsson prófessor segir þvert á móti að litlar upplýsingar séu til um það gos (sem og gosið 1934 sem mun einnig hafa verið talsvert öflugt).

Ég gúglaði Grímsvötn aðeins og kom þá fram á upplýsingar um gos í Grímsvötnum árið 1684 sem stóð að því er virðist hátt í eitt ár:

"Árið 1684 hófst eldgos í Grímsvatnajökli, sem annars er þakinn eilífum snjó og það með þvílíkum ofsa og magni að eldurinn sást víðsvegar um land. Gosið stóð svo lengi að ennþá í miðjum janúar árið 1685 mátti sjá það. Á undan eldgosinu fór gífurlegt vatnsflóð úr þessu sama fjalli í fljótið Jökulsá."

Ég sé þannig ekkert því til fyrirstöðu að gos þetta geti staðið í marga mánuði - allt upp undir ár - og finnst það mikill ábyrgðarhluti hjá "vísindamönnunum" okkar að vekja falsvonir hjá fólki um að það verði yfirstaðið á nokkrum dögum.

Þá gæri gott ef kennsla í íslensku væri stóraukin hjá raungreinafólkinu "okkar", svo sem á náttúru- og stærðfræðisviði í menntaskóla, eins illa máli farið sem það virðist vera - og illa að sér um rétta notkun hugtaka.

Þá á ég ekki aðeins við veðurfræðinginn á RÚV sem þrástagast á orðinu "landið okkar" eða "hjá okkur".

Askan fýkur út um allt