Vantar fleiri en Grétar!

Það væri auðvitað fróðlegt að fá að vita hvaða persónulegar aðstæður Grétars er um að ræða, en hann hefur spilað alla leiki með Bolton undanfarið.

En það vantar fleiri leikmenn sem hafa verið að spila vel með liði sínu.

Ber þar fyrstan að nefna Veigar Pál Gunnarsson sem hefur verið að skora í nær hverjum leik með liði sínu Stabæk í norsku úrvaldsdeildinni, en liðið er í toppbaráttunni ytra.
Þá vantar einnig Theódór Elmar Bjarnason sem hefur verið að spila mjög vel með Gautaborg í sænsku deildinni og rifið lið sitt upp eftir slæma byrjun.

Eyjólfur Héðinsson hefur einnig verið að spila reglulega með sínu liði og bjargaði því frá falli úr dönsku úrvalsdeildinni um síðustu helgi.

Í staðinn eru valdir menn eins og Guðmundur Kristjánsson úr Breiðablik, Jóhann Berg Guðmundsson í AZ Alkmar (sem lítið hefur fengið að spila með liði sínu), Alfreð Finnbogason (sem einnig hefur verið að spila lítið með Lokeren), Helga Val Daníelsson sem spilaði sinn fyrsta heila leik með AIK nú um síðustu helgi og Arnór Smárason sem var að falla með liði sínu Esbjerg (og var þá varamaður í fallliðinu!).

Já, það efast enginn um "snilld" landsliðsþjálfarans við að velja í landsliðið en hérna tekur þó steininn úr.

Þá má einnig spyrja sig hvort heppilegt sé fyrir 21 árs landsliðið að 10 leikmenn úr því séu valdir í landsliðshópinn gegn Dönum svona rétt fyrir úrslitakeppni 21 árs liðsins.
Við skulum bara vona að enginn þeirra meiðist í þessum þýðingarlitla leik fullorðinslandsliðsins.

Eiður í landsliðinu gegn Dönum