Hvað með íslenska liðið?

Landsliðsþjálfararnir okkar hljóta að vera í vandræðum með valið á íslenska liðinu eftir útkomuna í leiknum gegn Ungverjum - og meint meiðsli á nokkrum leikmannanna.

Reyndar er aðeins Gylfi Þór meiddur af þeim sem boðuðu forföll vegna "meiðsla" í þeim leik, en menn eins og Kolbeinn Sigþórsson og Sölvi Geir Ottesen spiluðu strax helgina á eftir með liðunum sínum.

Það vekur athygli að eftir landsleikinn við Ungverja hafa Hermann Hreiðarsson, Eggert Jónsson og Aron Einar ekkert spilað með liðum sínum (amk tveir síðastnefndu meiddir). Þá eru Birkir Bjarnason, Rúrik Gísla og ekki síst Heiðar Helguson ekki í byrjunarliði  félagsliða þeirra – og Heiðar ekki einu sinni í leikmannahópnum. Jóhann Berg er einnig yfirleitt varamaður hjá sínu félagsliði.

Af varamönnunum er það að segja að Alfreð Finnbogason og Jón Guðni komast ekki í byrjunarliðin hjá sínum félagsliðum (og var Jón ekki einu sinni í hópnum í síðasta leik). Elfar spilar heldur ekkert með Athenuliðinu, af Arnóri Smára heyrist ekkert þar sem hann spilar í b-deildinni í Danmörku (lið hans Esbjerg er þar með 3 stig eftir 2 leiki!) – og líklega mun hið sama eiga við um Arnór Svein Aðalsteinsson (í b-deildinni í Noregi).

Þannig nýtist æfingarleikurinn við Ungverja ekki neitt við að velja liðið í leikinn gegn Norðmönnum, enda valið alveg glórulaust.

Það eru hins vegar fullt af leikmönnum í atvinnumennsku ytra sem leika alla leiki með liði sínu og eru allir í byrjunarliði þess. Þeir eru því í topp leikformi og ættu að vera viðloðandi landsliðið. Nefna má eftirfarandi sem ekki hafa verið valdir undanfarið:

Hægri bakvörður: Grétar Rafn Steinsson (Andrés Már Jóhannesson)

Vinstri bakvörður: Bjarni Ólafur Eiríksson (Arnar G. Viðarsson)

Miðverðir: Ragnar Sigurðsson og Hjálmar Jónsson (Hallgrímur Jónasson)

Tengiliðir: Eyjólfur Héðinsson og Helgi Valur Daníelsson (Guðlaugur Victor Pálsson og Davíð Viðarsson)

Kantmenn: Theódór Elmar Bjarnason og Ari Freyr Skúlason (Steinþór Þorsteinsson)

Framherjar: Björn Bergmann Sigurðarson og Veigar Páll Gunnarsson (Pálmi Rafn Pálmason og Gunnar Heiðar Þorvaldsson).

Einhverjir þeirra hljóta að koma til greina í landsliðið, þó að ólíklegt sé að þeir verði valdir meðan núverandi þjálfarar eru við stjórn þess.

 

Drillo valdi 20 fyrir Íslandsleik