Verður Össur þar?

Össur skrifaði jú undir samþykkt NATÓ um að sjá um "flugbann" yfir Libýu til að "vernda almenna borgara", og Ísland varð þannig þátttakandi í hernaði hinna "viljugu" þjóða gegn stjórn Gaddafi.

Því má það sæta nokkurri furðu að ekkert heyrist nú  um þátttöku stórveldisins, Íslands, í fundi "Vina" Libýu. Auk Gissurs hefðu Vinstri-grænu hjúin Álfheiður Ingadóttir og Árni Þór Sigurðsson átt fullt erindi á þann fund.

Eftirfarandi var haft eftir þeim í umræðum á alþingi síðla veturs.

Álfheiður Ingadóttir um þetta mál m.a. í mars 2011 á Alþingi:

"Ég bind miklar vonir við það, frú forseti, að öryggisráðið sem situr nú á fundi nái í dag langþráðri niðurstöðu um frekari aðgerðir til að verja líbísku þjóðina gegn hernaði Gaddafís. Vopnasölubannið og aðrar þær aðgerðir sem voru ákveðnar í febrúar sl. hafa því miður ekki haft mikið að segja því að þvert á vonir um að Gaddafí mundi víkja fyrir lýðræðisbylgjunni hefur hann lagt undir sig hvert vígið á fætur öðru og nú bíða menn þess að Bengasí falli og í kjölfarið óttast menn, með réttu, víðtækar hefndaraðgerðir og jafnvel þjóðarmorð.

Því má það ekki dragast lengur, ekki deginum lengur, að það verði látið á það reyna í endanlegri atkvæðagreiðslu í öryggisráðinu hvaða þjóðir það eru sem þar munu beita neitunarvaldi gagnvart því að koma líbísku þjóðinni til hjálpar. Það er mín skoðun að á það verði að reyna fyrst því að ég tel ekki að Bandaríkjamenn einir eða með viljugum þjóðum eða NATO sem slíkt eigi að fara inn í annað arabaríki án samþykkis og ákvörðunar Sameinuðu þjóðanna.

Ekkert ríki á að geta haft neitunarvald þegar þjóðarmorð er í uppsiglingu. Ég vil í þessu sambandi, frú forseti, nefna að utanríkisráðherra Dana hefur bent á samþykkt Sameinuðu þjóðanna frá árinu 2005, um skylduna til að verja og vernda, Responsibility to Protect, sem opnar óhefðbundna leið fyrir Sameinuðu þjóðirnar til að bregðast við ef öryggisráðið er blokkerað með þessum hætti og stefnir í þjóðarmorð.

Formaður utanríkisnefndar. Árni Þór á Alþingi um Libýumálið á sama tíma:

"Ég tel að það sé forsenda þess að það geti orðið almennur stuðningur við aðgerðir alþjóðasamfélagsins að þær fari fram undir umboði og hatti Sameinuðu þjóðanna og ég tel að við eigum að hvetja til þess. Aðaláhyggjurnar núna eru að sjálfsögðu að Gaddafí muni hefna sín grimmilega á þeim sem veittu mótspyrnu og að fjöldamorð stjórnvalda geti verið í uppsiglingu. Kjörorð okkar í alþjóðamálum eiga að vera lýðræði, mannréttindi og mannúð; ekkert af þessu er í boði í Líbíu Gaddafís.”

----------------------------------------------------------------------

Nú hins vegar heyrist lítið um yfirvofandi "þjóðar"morð á stuðningsmönnum Gaddafi, hvað þá fréttir um að taka eigi hann og nánustu samstarfsmenn af lífi án dóms og laga eins og uppreisnarmennirnir hóta þessa dagana.

Já það er engu logið á hin borgaralegu öfl á Vesturlöndum, þar með taldir kratarnir í VG. Þau styðja alltaf hina raunverulegu glæpamenn og hjálpa þeim til valda með öllum ráðum. Dæmin frá Kósóvo, Albaníu, Sómalíu, Írak og Afganistan sanna það.

Og nú á að ausa í uppreisnarmenn fé, sem tilheyrir líbýsku þjóðinni. Dæmi sanna að þeir peningar skila sér ekki til almennings heldur verður stolið rétt eins og gerðist í Írak.

. 

Rússar hitta „Vini Líbíu“