Hvað með refsiaðgerðir gegn stjórnvöldum í Jemen?

Fréttirnar frá Jemen eru keimlíkar þeim fréttum sem heyrðust frá Libýu í upphafi átakanna þar og sem hafa heyrst frá Sýrlandi nú um langt skeið.

Bæði Libýa og Sýrland hafa verið beitt refsiaðgerðum. Eigur ríkjanna erlendis hafa verið frystar, sem og  ráðamanna - og fleiri refsiaðgerðum beitt (viðskiptabann og fl).

Hins vegar hafa stjórnvöld í Jemen fengið að vera óáreitt hingað til þó svo að mótmælin í landinu gegn þeim hafi staðið mánuðum saman.

Erlendum fréttamönnum í landinu, en þeir eru þar fjölmargir, ber saman um að mótmælin í gær hafi verið friðsamleg, en samt var skotið á mótmælendur.

Þetta er skýrt brot á mannréttindum almennings og ætti að kalla á viðbrögð alþjóðasamfélagsins.

Ástæðan fyrir því að það gerist ekki, er eflaust að finna í því að stjórnvöld þar eru markaðssinnuð, leyfa fjárfestingu vestrænna fyrirtækja í landinu - og hafa verið þægir stuðningsmenn vestrænna hagsmuna á svæðinu.

Þá gildir ekki það sem leiðtogi danskra jafnaðarmanna, sem vann kosingarnar um helgina, sagði að ríkisstjórn hennar myndi framfylgja. Þ.e. þeirri stefnu sem verið sé að framfylgja í Libýu, eða að ráðast á þær þjóðir þar sem stjórnvöld brytu á þegnum sínum.

Já, það er ekki sama hann Jón eða veslingurinn hann séra Jón.

Skjóta á mótmælendur í Sanaa