Hlutdrægnin í Haag

Alþjóðlegi stríðsglæpadómstóllinn í Haag hefur enn einu sinni opinberað hlutdrægni sína í málefnum Afríku. Hann tekur þátt í leiknum með núverandi stjórnvöldum á Fílabeinsströndinni sem gengur út á það að taka pólitískan andstæðing úr umferð.

Allir sem þekkja eitthvað til málanna þarna, og eru hlutlausir, eru sammála um að stríðsglæpirnir voru á báða bóga. Reyndar komu margoft fram tilkynningar frá hjálpar- og mannréttindasamtökum meðan á borgarastyrjöldinni stóð, um að uppreisnarmennirnir, núverandi stjórnvöld, hafi verið miklu stórtækari í ódæðisverkunum - jafnvel drepið tugþúsundir manna með köldu blóði.

En þeim er ekki stefnt fyrir dómstólinn í Haag. Af hverju ekki? Jú vegna þess að núverandi stjórnvöld eru vestrænum ríkisstjórnum þóknanleg, en ekki hinn fyrrverandi. Er skemmst að minnast þess að franski flugherinn tók virkan þátt í bardögunum og gerði meðal annars loftárás á forsetahöllina.

Reyndar bendir allt til þess að sjálf uppreisnin hafa verið af rótum vestrænna aðila. Og nú skal ganga skrefi lengra og fjarlægja mann af vettvangi sem fékk um helming atkvæða í síðustu forsetakosningum.

Já, ástin á lýðræðinu er alltaf jafn mikil hér hjá okkur hinum lýðræðissinnuðu Vesturlöndum.

Gbagbo kominn til Hollands