Gnarr ekkert betri en hinir

Það var ótrúlegt að horfa upp á hrokann í Jóni Gnarr í sjónvarpsfréttum þegar hann sagðist vel geta haft meira samráð við stjórn Orkuveitunnar þegar hann selur Perluna aftur!

Við skulum bara vona að hann fái hana ekki í hausinn aftur og þurfi því að selja hana tvisvar.

En það er í raun það sem er að gerast. Viljayfirlýsingin varðandi hæsta tilboðið í eignina eru svo glórulaus að hún mun vonandi aldrei standast. Tilboðsgjafarnir bitu svo höfuðið af skömminni með því að viðurkenna að þeir hafi sett alls kyns fyrirvara í tilboðið. Þessir fyrirvarar verða vonandi aldrei uppfylltir enda óaðgengilegir með öllu - ef allt væri með felldu.

En svo virðist ekki vera eftir því sem hljóðið er í Gnarr. Í raun er verið að selja lóðaréttindi og byggingarrétt á svæðinu en látið heita sem svo að verið sé að selja eign Orkuveitunnar. Hún fær þannig peninginn inn í sína hít og getur því grynnkað eitthvað á skuldum sinum!

Svo eru menn að tala um slæmt siðferði fjórflokkanna. Besti flokkurinn hefur beðið algjört skipsbrot með þessari stjórnvisku sinni.

„Ástæðulaust upphlaup“