Birkir og nýi umboðsmaðurinn

Umboðsmaður Birkis Bjarnasonar, Jim Solbakken, er maður umdeildur. Nú er hann undir rannsókn vegna sölu Hangelands, landsliðsmiðvarðar Norðmanna og leikmanns Fulham, en Solbakken er sagður hafa verið báðum megin við borðið við söluna.

Það gekk allt í haginn hjá Birki meðan hann var með Ólaf Garðarsson sem umboðsmann. Honum bauðst nýr samningur hjá Viking snemma árs eftir virkilega gott tímabil með liðinu. En þá skipti hann um umboðsmann. Jim Solbakken kom inn á sviðið og var fljótur að koma með yfirlýsinga.

Það væri rangt af Birki að semja við Viking heldur ætti hann að bíða þar til eftir Evrópumót 21 árs landsliða, sem væri hinn fullkomni sýningargluggi. Á sama tíma var Viking tilbúið að bjóða Birki mun betri samning en áður en það var ekki þegið.

Eftir það fór að ganga á verri veginn hjá Birki hjá liðinu. Tímabilinu lauk með mikilli bekkjarsetu og engu tilboði. Hann varð jafnframt mjög óvinsæll hjá stuðningsmönnum Viking, sagður latur, feitur - og annað verra -, enda stóð hann sig illa með liðinu.

Á heimasíðu Víkings segir að það sé mjög hljótt um Birki. Svo gæti farið að Viking bjóði honum nýjan samning en mun lakari en honum stóð til boða fyrir EM.

Solbakken ber sig þó vel og segir fjölda liða vera á eftir Birki. Miðað við orðstí umboðsmannsins, hann er jú talinn skúrkur, bendir flest til þess að það sé óskhyggja eða hreinar lygar hjá manninum.

Annars er Birkir ekki sá eini sem hefur orðið fyrir vonbrigðum með EM og gluggann sem þar átti að opnast. Í raun hefur enginn leikmaður liðsins verið seldur til betra liðs eftir mótið eða fyrir mikinn pening. Spádómar íslenskra sparkspekinga í þá áttina hafa heldur ekki orðið að veruleika.

Líklega hefur EM ekki verið eins merkilegt mót og menn hér heima vildu vera láta - og árangur íslenska liðsins ekki eins góður heldur ...

 

Birkir eftirsóttur samkvæmt umboðsmanni