"of góðu formi"??

Þetta hljómar nú sem öfugmæli frá aðalmarkmanninum okkar. Hann hefur sjaldan leikið eins illa á stórmóti og núna og er greinilega í lélegu leikformi. Skýringuna má eflaust finna í því að hann hefur lítið fengið að spila með liði sínu, Magdeburg, eftir að hann kom þangað. Það hefði verið betra fyrir íslenska landsliðið hefði hann haldið áfram að spila með svissneska liðinu þar sem hann stóð yfirleitt í markinu (en sat ekki á bekknum).

Þessi staðreynd víkur huganum að landsliðsþjálfaranum og þeirri ákvörðun hans um að senda hinn leikreynda markmann Hreiðar Levý heim en taka hinn óreynda Aron inn í staðinn.

Sænsku þjálfararnir brugðust öðruvísi við slakri markvörslu hjá sænska landsliðinu. Þeir kölluðu til þriðja markmanninn og sendu útileikmann heim í staðinn. Það er auðvitað miklu minni áhætta því hvað gerist ef Björgvin meiðist?

Þá orkar ákvörðunin að senda Odd heim einnig mjög tvímælis. Hver á að spila hornið ef Guðjón Valur meiðist? Guðmundur landsliðsþjálfari hefur reyndar leikið þennan leik með Guðjón áður, sem tókst illa, þurfi að setja útileikmann í hornið.

Mér finnst eðlilegt að hafa tvo menn um hverja stöðu (og þrjá ef þarf í markvarðastöðuna). Íslenska liðið er hins vegar með einn hornamann vinstra megin en þrjá línumenn. Þá eru þrjár skyttur hægra megin, en einn þeirra getur þó vel spilað í horninu, en fyrir er aðeins einn hreinræktaður hornamaður. Þá eru í raun þrír varnarmenn að spila aðeins vörnina.

Mér hefði fundist eðlilegra að fækka úr þremur í tvo í öllum stöðum nema markinu. Ólafur Bjarki hefur lítið sem ekkert fengið að spila enda hefur Arnór verið að leika vel (og hefði Ólafur vel mátt fara heim í stað Odds).

Aron hefur hins vegar brugðist svo eðlilegt er að hafa Ólaf Guðmundsson í liðinu og svo auðvitað nota hann (en hann hefur ekkert fengið að koma inná!). Auk þess er hann betri varnarmaður en Aron. Þá hefði mátt fækka línumönnunum um einn (taka t.d. Kára útaf) frekar en markmanninn.

En hvað með það. Vonandi vinnum við Ungverjana í dag þrátt fyrir þetta sérkennilega val landsliðsþjálfarans á hópnum. Það er líklega eini möguleiki okkar á sigri í milliriðlinum.

Ég vil þó minna á að liðið tapaði fimm síðustu leikjunum á síðasta stórmóti. Nú eru komin tvö töp. Ætli þau verði fimm eins og síðast?

 

 

Björgvin: Langt undir væntingum