Jamm

Það er hætt við að Lars Lagerbäck ætli að nota Eggert sem varnartengilið hægra megin fyrst hann bætti ekki reyndum varnartengiliði inn í liðið.

Mér telst svo til að Eggert hafi aðeins spilað í um 70 mín. síðan enska 1. deildin og deildarbikarinn hófst í haust. Hann var ekki einu sinni í leikmannahópnum hjá Wolves í sjö leikjum af 10 en á bekknum í þremur leikjum og spilaði í 7 mín. Þá var hann eitt sinn í byrjunarliðinu, í deildarbikarnum gegn 4. deildarliði, og spilaði í 67. mín.

Þrátt fyrir að fyrstudeildarlið á Englandi geti ekki notað Eggert er hann samt alltaf valinn í íslenska landsliðshópinn og verður líklega í byrjunarliðinu gegn 15. sterkasta liði í heimi!

Flestir aðrir landsliðsþjálfarar hafa það sem reglu að segja hugsanlegum landsliðsmönnum að leita sér að öðru félagsliði eða biðja um að fara á leigu ef þeir fá ekkert að spila með liði sínu - annars verði þeir ekki valdir í landsliðið. Ekki íslensku landsliðsþjálfararnir!

Leikþjálfun skiptir þannig mjög miklu máli í fótboltanum, rétt eins og í öllum öðrum íþróttagreinum, og ætti auðvitað að gera útslagið þegar valið er í landslið.

Þá skiptir einnig máli hversu sterk deildin er sem þú leikur í.

Íslenska deildin þykir t.d. ekki sterk, er í 40. sæti í Evrópu ef byggt er á árangri félagsliða í Evrópukeppnunum. Ef nefndar eru þær deildir þar sem Íslendingar leika þá er enska úrvalsdeildin í 2. sæti (Gylfi Sig.), sú ítalska í 4. sæti (Birkir Bjarna), sú hollenska í 8. sæti (Alfreð Finnboga og Jóhann Berg), sú belgíska í því 11. (enginn!!), sú tyrkneska í 12. (Grétar Rafn) og sú danska í því 15. (Ragnar Sig).

Þjálfari danska stórliðsins FCK segir þetta um belgísku deildina í samanburði við þá dönsku (á dönsku!):  "Den belgiske liga er sværere. Det er en hård liga, hvor alle hold forsvarer sig godt, og der er en masse mand-mod-mand-dueller. Der får man ikke lov til at spille så uforstyrret, som man for eksempel gør i Danmark."

Því vekur furðu að enginn íslensku leikmaður í belgísku deildinni skuli vera valinn í landsliðið, ekki einu sinn þegar veikindi og leikbann eru að hrjá liðið, einmitt í þeim stöðum sem "belgísku" leikmennirnir eru að spila.

Tekið skal fram að svissneska úrvalsdeildin er mun veikari en sú belgíska, m.a.s. veikari en sú danska, eða í 16. sæti.

 

 

Kemur Eggert beint inn í liðið?