Aron Einar alltaf á bekknum!

Síðan leiktímabilið í enska boltanum byrjaði í haust hefur Aron Einar Gunnarsson vermt bekkinn í öllum deildarleikjum Cardiff, níu talsins! Hann hefur komið inná í þremur þeirra en þá þegar langt var liðið leiks og spilað í um 30 mínútur í allt. Auk þess hefur hann spilað einn bikarleik.

Þetta er nú allt og sumt.

Í íslenska landsliðinu í haust kveður við annan tón. Þar hefur hann alltaf verið í byrjunarliðinu og spilað út nær alla leikina.

Landsliðsþjáfararnir hafa tröllatrú á honum, hann sjálfur auðvitað (ekki skrítið miðað við týpuna!) og síðast en ekki síst hrósa sparkspekingar fjölmiðlanna honum í hástert.

Tökum nokkur dæmi. Eftir leikinn gegn Hollandi var Aron Einar valinn maður leiksins á fottbolti.net. Sama hljóðið var á 433.is (þessir spekingar hljóta að vera frá Akureyri og Þórsarar að auki!) og á visir.is: "Átti miðjuna. Hélt stöðu frábærlega og las vel þegar aðrir leikmenn hlupu út úr stöðu. Rak sína menn áfram og hélt vinnslunni gangandi."

Í leiknum gegn Kazakstan (þar sem Aron Einar var rekinn útaf) var hann einnig valinn maður leiksins (á visir.is):"Frábær á miðjunni og teymdi liðið í gegnum stress-kaflann í fyrri hálfleik. Batt liðið saman".

Það er greinilegt að þjálfari welska liðsins veit ekki neitt um fótbolta - og furðulegt að hann láti heimsklassaleikmann eins og Aron Einar sitja á bekknum leik eftir leik.

Eða skyldi kannski eitthvað vera að fótboltavitinu í íslenskum sparkspekingum?

Bið Arons nær 37 dögum