Lítil fjölskylda?

Það er greinilegt að Lagerbäck lítur á íslenska karlaliðið "sitt" í fótbolta sem lokaðan hóp sem ekki verður breytt: "við ... höf­um kynnst þeim bet­ur og þeir okk­ur". 

Það er einmitt það sem hann hefur helst verið gagnrýndur fyrir, að vera mjög íhaldssamur í vali sínu á landsliðið og ekki hleypt nýjum mönnum að. Þá skiptir engu máli hvernig litli hópurinn stendur sig með sínum félagsliðum, eða hvernig þau lið standa sig. Alltaf er spilað á sömu leikmönnunum.

Ég tók saman upplýsingar um síðasta byrjunarliðið sem sýnir þetta:

Markvörður: Ögmundur Kristinsson (Hannes Þór er meiddur og óvíst hve lengi): (Ögmundur leikur alla leiki með Hammarby en liðinu gengur ekkert sérstaklega vel, er í 10. sæti (af 16)).

Hægri bakvörður: Birkir Már Sævarsson (Birkir leikur sömuleiðis alla leiki með sama liði)

Vinstri bakvörður: Ari Freyr Skúlason (Ari leikur alla leiki með OB sem, heldur gengur ekkert alltof vel, er í 8. sæti (af 12) í dönsku úrvalsdeildinni).

Miðvörður: Kári Árnason (Kári er að spila alla leiki með góðu liði sem er í meistaradeildinni og í 5. sæti í sænsku úrvalsdeildinni)

Miðvörður: Ragnar Sigurðsson (Ragnar hefur verið að spila með Krasnodar í rússnesku deildinni, þó ekki reglulega, en spila alla leiki í Evrópudeildinni. Liðinu gengur betur úti í Evrópu en heima fyrir)

Miðjumaður: Aron Einar Gunnarsson (Aron hafði aldrei verið í byrjunarliði Cardiff í ensku b-deildinni og aðeins leikið í um 30 mín., en byrjaði inná í síðasta leik)

Miðjumaður: Gylfi Þór Sigurðsson     (Gylfi hefur ekki verið að leika vel með Swansea og var tekinn út úr byrjunarliðinu í síðasta leik. Liðið er í neðri helmingi ensku úrvalsdeildarinnar).

Hægri kantur: Jóhann Berg Guðmundsson (Jóhann Berg hefur byrjað alla leiki með Charlton en tekinn útaf í næstsíðasta leik. Meiddur í þeim síðasta. Liðinu hefur gengið illa í b-deildinni ensku það sem af er, er í fallsæti (22. sæti af 24))

Vinstri kantur: Birkir Bjarnason (Birkir hefur spilað mikið með Basel sem er langefst í svissnesku deildinni og er í Evrópudeildinni)

Framherji: Jón Daði Böðvarsson (út ´82). (Jón Daði spilar reglulega með Viking í norsku úrvalsdeildinni en hefur ekki verið að fá góða dóma undanfarið – og hefur ekki skorað í síðustu fjórum leikjum. Liðið er nú í 5. sæti).

Framherji: Kolbeinn Sigþórsson (út ´88). (Kolbeinn er á bekknum hjá nýja félaginu, Nantes, en spilar þó talsvert. Liðið er í 12. sæti af 20)

Varamenn: Viðar Örn Kjartansson ´82 (Viðar spilar reglulega með kínverska liði sínu).

Alfreð Finnbogason ´88 (Alfreð er yfirleitt varamaður hjá Olympíakos sem er langefst í grísku úrvalsdeildinni og er með í Meistaradeildinni. Þar gerði Alfreð sigurmarkið gegn Arsenal og fékk því að byrja inná með landsliðinu í jafnteflisleiknum hér heima gegn Lettum. Á bekknum allan síðasta meistaradeildarleik).

Þetta lið, nær óbreytt, fékk 2 stig af 9 mögulegum í síðustu þremur leikjum - og gegn slökum liðum (nema þokkalegum Tyrkjum). Nú bíða aðrir og sterkari mótherjar ... Tími kominn til breytinga.

Metnaðurinn má ekki fella okkur