Hverja vantar?

17.3.2008 | 16:30

Það er alltaf fróðlegt að sjá liðskipan landsliðsþjálfarans hverju sinni, því það segir töluvert um hann og hvernig hann vinnur vinnuna sína. Núverandi þjálfari byggir nokkuð á leikmönnum sem leika hér heima, þ.e.a.s. á markmönnum og varnarmönnum. Hinir leika reyndar í útlöndum.

Þá er spurning hverja vantar og hverjir séu t.d. að leika í útlöndum sem ekki eru í hópnum.

Fyrst ber auðvitað að nefna aðalmarkmann okkar til margra ára Árna Gaut Arason. Hann mun vera á leið til liðs í S.-Afríku. Er hann algjörlega úr úr myndinni eftir að Vålerenga losaði sig við hann?

Fleiri Norðmenn vantar, bæði þá sem hafa verið í landsliðinu og þá sem ekki hafa hlotið náð ennþá. Þeir áður náðugu eru t.d. Ármann Björnsson og Ólafur Bjarnason úr meistaraliði Brann - og Indriði Sigurðsson í Lyn. Fleiri má nefna eins og Harald Guðmundsson miðvörð í Álasundi og Garðar Jóhannesson framherja í Fridriksstad sem báðir hafa staðið sig vel í fyrstu deildinni norsku, en hafa ekki einu sinni verið prófaðir í íslenska landsliðið. Einnig er Gylfi Einarsson kominn til Norgegs og Brann.

Í Svíþjóð má nefna mann eins og Hjálmar Jónsson vinstri bakvörð sem er fastamaður í meistaraliðinu Götaborg og hefur spilað mikið með landsliðinu upp á síðkastið. Hann er ekki valinn nú. Ekki heldur Gunnar Þór Gunnarsson sem mun vera kominn til Sundsvall en var hjá Hammarby. Þá eru tveir (þrír?) aðrir Sundsvellingar ekki í liðinu, gamli FH-ingurinn Sverrir Garðarson (sem þó fékk náð hjá fyrrverandi þjálfara sínum í fyrra) og Hannes Sigurðsson (Ari Skúlason líka?). Einnig virðist Sölvi Ottesen hjá Djurgården, Jóhann Guðmundsson og Eyjólfur Héðinsson hjá Gais (hefur reyndar verið prófaður) og svo kapparnir hjá Nörrköping; Stefán Þórðarson og Garðar Gunnlaugsson alls ekki koma til greina.

Af Dönum hefði mátt athuga Rúrik Gíslason hjá Viborg og Kára Árnason hjá AGF sem báðir hafa fengið að reyna sig í landsliðinu. Á meginlandinu er það líklega aðeins Arnar Viðarsson sem gæti komið til greina (en bróðirinn valinn í staðinn).

Og í Englandi er Jóhannes Karl Guðjónsson (bolabíturinn) loksins kominn í byrjunarlið Burnleys en þá er hann settur út úr landsliðinu!

Já, mikil er speki landsliðsþálfaranna okkar. Ég hefði t.d. viljað sjá Ólaf Bjarnason og Indriða í vörninni (og Árna Gaut í markinu), jafnvel Sölva Ottesen og svo Hjálmar auðvitað.

Á miðjunni er alveg sjálfsagt að kíkja á Jóhann Guðmundsson, sem er kannski eini góði sóknartengiliðurinn sem við eigum, og jafnvel Kára kappann (Arnar hefur og staðið sig vel með nýja liðinu sínu í Belgíu).

Í sókninni er Hannes Sigurðsson mjög álitlegur kostur en einnig Garðar Jóhannesson sem er mjög vel spilandi senter og mikils metinn í Noregi. Er ekki kominn tími til að gefa Helga Sigurðssyni frí?