Svíarnir segjast vera betri en við!

Mér sýnist á viðtali við Svíana eftir stórsigur þeirra á Argentínu og tap okkar manna gegn Pólverjum að þeir telji nokkuð örugga áfram. Að minnsta kosti segir litli dvergurinn frá Lugi (í Lundi þar sem Jón Hjaltalín gerði garðinn frægan í den), miðjumaðurinn Dalibor Doder, sem hefur verið besti sóknarmaður sænska liðsins til þessa: "Við erum betra liðið"!

Þessu verða Íslendingar að svara með viðeigandi hætti!
Eins og flestir vita verður íslenska liðið að vinna leikinn á morgun til að komast áfram á Ólympíuleikana. Það gæti auðvitað reynst erfitt því Svíarnir hafa tak á okkur, unnu til dæmis frekar auðveldan sigur á EM í janúar 24-19.

En við unnum þá jú í umspili um sæti á HM og ættum alveg að geta það aftur. Þjálfari Svíanna segist þess vegna hafa beðið eftir þessum leik í þrjú ár. Hann þykist enn eiga harma að hefna en það eigum við einnig eftir EM.

Íslenska liðið á greinilega heilmikið inni miðað við leikinn gegn Póllandi. Óli skoraði varla fyrir utan punktalínu og Guðjón Valur skoraði varla fyrr en undir lok leiksins. Næstum engin hraðupphlaup sáu dagsins ljós.

Ég vil minna á að liðið Ólafs varð Evrópumeistari eftir að hafa tapað heimaleiknum í úrslitunum en vann svo seinni leikinn úti þökk sé Óla. Nú er aðalatriðið að peppa hann upp, svo hann endurtaki leikinn. Þá hefur Kim Andersson (Kielspilarinn) átt lélega leiki hingað til svo það er vissulega möguleiki að vinna Svíanna. Leiðin til þess er líklega að stoppa þennan Doder og skjóta af skynsemi á sænsku markverðina. Þeir hafa stórspilað á þessu móti og gætu auðveldlega unnið leikinn fyrir sitt lið (og hafa margoft gert).

Vandamálið er auðvitað lítil breidd íslenska liðsins. Sömu menn spiluðu allan leikinn á móti Pólverjum og hljóta að vera þreyttir nú. Auk þess var markvarslan ekki sannfærandi.

Guðmundur þjálfari hefur engu að tapa nema starfinu og þarf hér að sanna það að hann sé betri þjálfari en Alfreð. Reyndar finnst mér hann hafa gert það nú þegar, með því að treysta á Arnór Atlason, sem hefur staðið sig glimrandi hingað til (leikmaðurinn sem Alfreð gat ekki notað).

Sex marka tap gegn Pólverjum