Ágætis mælikvarði á frammistöðu landsliðsþjálfarans?

Fall um 10 sæti!

Ólafur landsliðsþjálfari hefur fengið mikla gagnrýni fyrir val sitt á landsliðinu og má rekja fallið á styrkleikalistanum til þessa sérkennilega vals á leikmönnum. Sem dæmi má nefna að einn besti leikmaður í norska boltanum, Veigar Páll Gunnarsson, var ekki valinn í liðið fyrr en að fjölmiðlar í Noregi fóru að benda á þessa furðulegu staðreynd (og bloggverjar og fjölmiðlafólk fóru að vekja athygli á þessu en þess var þörf því landsliðsþjálfarinn kann jú enga útlensku). Reyndar spái ég því að Veigar byrji á bekknum og komi seint eða ekkert inná!

Heimóttarleiki Ólafs þjálfara kom reyndar best fram um daginn þegar hann valdi tvo leikmenn sem spila hér heima í stað tveggja meiddra leikmanna (sem spila á Norðurlöndunum). Hann virðist feta í fótspor fyrirrennara sinna sem nenntu aldrei til útlanda til að kíkja á leikmenn þrátt fyrir að vera í fullu starfi sem landsliðsþjálfarar og á fínu kaupi - og velur því menn hér heima sem hann hefur sóma síns vegna neyðst til að fylgjast með.

Nú er bara að vona að leikirnir á móti Noregi og Skotlandi verði ekki algjört fíaskó fyrir íslenska landsliðið, en miklu skiptir að byrjað sé vel í undankeppni sem þessari þar sem aðeins eru leiknir átta leikir. Valið á landsliðinu gefur þó ekki tilefni til mikilla væntinga.

 

Ísland í 107. sæti á nýjum FIFA lista