Náð landsliðsþjálfarans?

Fyrirgefið tuðið enn einu sinni vegna vals landsliðsþjálfarans á landsliðinu, en það er þó skemmtilegra en að lesa þessi endalausu blogg og fréttir af fjármálakreppunni. Þegar ríkisstjórnin er farin að tala um kreppu þá hlýtur stórþjófnaður að standa til.

En að frétt Moggans um að hljóta náð hjá Óla þjálfara. Blaðamaðurinn finnur hjá sér þörf á að benda á það að Gunnar Heiðar sé ekki í landsliðshópnum, eftir að hann fékk loksins tækifæri með liði sínu og skoraði sitt fyrsta mark með því, en lið hans er næstneðst í dönsku úrvalsdeildinni!

Á meðan er hörku leikmenn að spila hvern leik með bestu liðunum í Noregi og Svíþjóð og eru ekki nefndir á nafn (markaskorarar eins og Garðar Jóhannsson, Birkir Bjarnason og Eyjólfur Héðinsson og jaxlar eins og Gylfi Einarsson og Ólafur Örn Bjarnason hjá Brann, sem hafa verið að spila í Evrópukeppninni, og Hjálmar Jónsson (jafnvel Kári Árnason í Danmörku)).

Á meðan eru menn valdir í liði sem fá ekkert að spila með sínum liðum (Hermann Hreiðarsson og Arnór Smárason) og eru ekki einu sinni valdir í leikmannahópinn (Heiðar Helguson) og eru því ekki í neinni leikæfingu. 

Ég vona að þetta verði til þess að Ragnar Sigurðsson og Veigar Páll Gunnarsson verði valdir í byrjunarliðið í stað Hermanns og Heiðars.

Veigar er í sama góða forminu og hann hefur verið í allt sumar og haust, skorar í nær hverjum leik, er alltaf í byrjunarliðinu og spila nær alltaf allan leikinn með besta liðinu í Noregi í ár.

Er hann ekki sjálfsagður í byrjunarliðið á kostnað Heiðars? 

 

Fyrsta mark Gunnars Heiðars dugði til sigurs

Athugasemdir

[Dunni, 5.10.2008 kl. 16:08]

Þú segir nokkuð. Ég held að menn þurfi ekkert að vera í náðinni hjá landsliðsþjálfaranum til að að komast í liðið.  Þeir þurfa að sýna hvað þeir geta.

Eftir að Gunnar Heiðar yfirgaf Vålerenga í Noregi hefur hann ekki riðið feitum hesti en hann var góður hér.  Það er eitt dæmi um að einn leikmaður passar vel í leikstíl eins liðs en afleitlega hjá örðu.  En ég held að þurfi meira en eitt mark til að einhver blaðamaður geti skrifað hann inn í landsliðið.

Hvað varðar Ólaf Örn þá hefur hann sagt fyrir löngu að hann gefi ekki kost á sér í landsliðið. Hjálmar Jónsson hefur spilað mjög vel sem bakvörður hjá Gautaborg en hann neitaði að spila þá stöðu með landsliðinu og maður sem ekki vill spila þá stöðu sem þjálfarinn óskar er að sjálfsögðu ekki valinn aftur.

Gylfi Einarsson var lengi meiddur og á enn dálítið í land til að vera í sínu besta formi.  Hann hefur lítið leikið med Brann á leiktíðinni en upp á síðkastið hefur hann fengið tækifæri og verið góður. Betri en Erik Bakke að mínu mati.

Þó Hermann Hreiðarsson hafi dottið út hjá Portsmouth um tíma er hann án efa lang besti miðvörður sem við eigum. Hann heldur forminu og á að sjálfsögðu vera í liðinu með þá reynslu sem hann hefur.

Einhvern veginn held ég að Birkir Bjarna og Garðar Jóhanns fái fljótt að þefa að A-landsliðinu.  Hef trú á að Brikir verði fyrri til þar sem hann spilar stöðu sem við eigum ekki jafn marga leikmenn í. Birkir bætir sig í hverjum leik og á ekki minnsta þáttin í að Bodö, sem allir spáðu falli í vor, er að slást fyrir toppsæti í norsku deildinni á haustdögum.

Veigar og Heiðar eru svo gjörólíkir leikmenn að það er ekki hægt að bera þá saman. Eitt er þó víst. Að saman í fremstu víglínu landsliðsins yrðu þeir óhemju góðir.  En þá yrði að fórna Eiði Smára og það gæti orðið dýr fórn.

Alltaf gaman að velta sér upp úr landsliðsvalinu.  Þar höfum viðm örugglega 300  þúsund skoðanir að velja á milli.