Veigar bestur!

Veigar var bestur í íslenska liðinu og fáránlegt að taka hann út af (Pálmi Rafn kom varla við boltann eftir að hann kom inn á). Veigar hélt boltanum mjög vel, miklu betur en Eiður, og hjálpaði liðinu þannig að færa sig framar þegar á því lá.

Svo var Theodór Elmar frískur þegar hann kom inn á. Birkir var allt í lagi og Grétar Rafn öflugur (Kristján frábær eins og venjulega) en miðjan var vandamál eins og svo oft áður. 

Ég er alls ekki sammála mönnum um að Indriði Sigurðsson hafi verið slakur í leiknum. Hann átti margar fínar sendingar fyrir markið og var duglegur að koma upp kantinn vinstra megin. Hann lenti hins vegar í miklum erfiðleikum vegna Hermanns Heiðarssonar. Mér fannst sökin á vandræðaganginum í vörninni oft á tíðum vera hjá Hermanni, rétt eins og í leiknum hjá Hollendingum þar sem hann átti sök á báðum mörkunum (með því að spila leikmann Hollendinga réttstæðan í fyrsta markinu og svo að fara út úr stöðu sinni við annað markið (sem ekki var rangstaða eins og margir héldu fram)).

Í leiknum núna átti Hermann nokkrar fáranlegar sendingar út úr vörninni sem sköpuðu stórhættu, auk þess sem hann var hvað eftir annað kominn út úr stöðu sinni (og átti auk þess í mestu erfiðleikum með að gæta besta manns Makedóníu, enda alltof seinn leikmaður til að leika í miðri vörninni). Þetta varð til þess að Indriði neyddist hvað eftir annað að fara inn í miðja vörnina til að hjálpa Hermanni. Við það þurfti Emil oft á tíðum að spila eins og vinstri bakvörður.

Þá var Aron alltof grófur í þessum leik (eins og oftast áður) og heppinn að fá ekki spjald miklu fyrr í leiknum, auk þess sem hann missti boltann klaufalega nokkrum sinnum.

Ég skil ekki af hverju Helgi Valur Daníelsson er ekki í liðinu í stað stráks eins og Arons. Helgi er í toppliði í Svíþjóð (Elfsborg) og leikur alla leiki þegar hann er heill - og við hliðina á ekki lakari leikmanni en Anders Svensson. 

Nei, það þarf reynslubolta í svona leiki en ekki einhverja stráklinga sem grípa til þess eina ráðs að brjóta á mönnum þegar á móti blæs.

Leikurinn var annars arfaslakur hjá íslenska liðinu og það stálheppið að vinna hann. Þjálfararnir fá falleinkun hjá mér fyrir stjórnun sína á því.  

Veigar tryggði 1:0 sigur á Makedónum