Er þetta ekki málið?

Ég held að flestum ætti nú að vera ljóst að við verðum að ganga að samninga- og sáttaborðinu og semja við Breta og aðra lánadrottna um greiðslu á þeim skuldum sem íslensku bankarnir hafa komið sér í. Annars fáum við jú engin lán og verðum gjaldþrota á mjög skömmum tíma.

Það er eflaust hægt að væla út hagstæða samninga á þeim forsendum að við séum svo lítil þjóð og eigum svo bágt.

Jafnframt verðum við hins vegar að ganga skjótt í það verk að koma höndum yfir þær eignir hérlendis - og jafnvel erlendis - sem þeir aðilar, sem hafa steypt þjóðinni í þetta skuldafen, hafa sankað að sér undanfarinn áratug.

Við vitum jú hverjir voru helstu eigendur gömlu banka og komu þeim í þrot með siðlausum lántökum. Taka verður eignir þeirra upp í þær skuldir - einfaldlega þjóðnýta þær því lagaleiðin tekur alltof langan tíma og gæti verið langsótt - og koma þeim sem fyrst í verð.

Það er kominn tími til að stjórnvöld vakni af afneitunardvalanum ("við borgum ekki"), og fari að bera ábyrgð á stjórnsýslunni. Ef ekki þá eru nægilega margir hæfir aðilar til að taka við af þeim - og eru eflaust tilbúnir til þess þegar á þessari stundu.

En auðvitað er langbest að ný ríkisstjórn sjái um þessa samninga svo að hin gamla, spillta, noti ekki enn og aftur tækifærið til að skara eld að sinni köku - og vina sinna - við þá samningagerð. 

Því er krafa komandi laugardags þessi: Burt með ríkisstjórnina - nýjar kosningar strax!

Aðstoð háð sættum

Athugasemdir

[Óskar Gestsson (IP-tala skráð) 12.11.2008 kl. 21:59]

Akkúrat! Það er klárt mál að þeir munu ekki gefa þetta eftir og því lengur sem við gerum ekki neitt, því dýpra gröfumst við niður í skítinn. Persónulega er ég reyndar komin á þá skoðun að við eigum ekkert að taka þetta IMF lán heldur fleygja þessari vonlausu krónu og taka einhliða upp EVRU. Hvað ætla þeir (ESB) að gera ef við tökum einhliða upp EVRU? Málið er að þeir geta ekkert gert lagalega séð. Þannig að ef ríkis-ó-stjórnin ætlar ekki að semja við Bretana, þá VERÐUM við að taka einhliða upp EVRU, því krónan flýtur ekki án lánsins frá IMF, heldur sekkur! EF ríkis-ó-stjórnin ákveður hins vegar að semja, þá liggur það ljóst fyrir að taka verður eignir auð-apana upp í verðið. Það kemur bara ekkert annað til greina.