Hvaða mörk setti Samfylkingin?

Samfylkingin hefur nú setið í ríkisstjórn í 18 mánuði án þess að hafa sett bönkunum nein mörk þrátt fyrir að hafa átt ráðherrann sem átti að sjá um þessi mál, þ.e. viðskipta- og bankamálaráðherrann. Engin bindiskylda, ekkert eftirlit með útrás bankanna, ekkert eftirlit með starfsemi þeirra yfir höfuð o.s.frv.

Svo heldur Ingibjörg því fram að Samfylkingin hafi ekki átt sök á ofsafrjálshyggjunni!! Hún hefur það svo sannarlega. Og það sem meira er, ennþá hefur hún ekkert gert til að snúa við blaðinu.

Hún hefur ekki lagt fram neinar áætlanir um að breyta málunum, engar auknar álögur á hátekju- og fjármagnstekjufólk, engar hugmyndir um að færa til eignarhaldið í samfélaginu, engar hugmyndir um að halda bönkunum í ríkiseign (heldur er einkavinavæðingin boðið enn á ný), bankaleyndin ekki afnumin o.s.frv.. Álögurnar lenda eins og venjulega á lag- og miðlungstekjufólki, sjúklingum og þeim öðrum sem eiga undir högg að sækja.

Nei! "Ekki benda á mig"-pólitík Samfylkingarinnar er ekki trúverðug, enda er flokkurinn rúinn trausti þjóðarinnar.

Og það sem verra er fyrir Samfylkinguna. Formaður flokksins hefur algjörlega fyrirgert trausti almennings. Auðvitað er réttast að hún stigi til hliðar og gefi öðrum Samfylkingarmanni eftir sæti sitt í ríkisstjórninni - já eða fari einfaldlega með flokkinn úr ríkisstjórn.

Ingibjörg: Orsökin liggur í ofsafrjálshyggjunni