Vopnahlé?

Svo virðist sem frásagnir nokkurra fjölmiðla um að Hamas hafi fallist á skilyrði Ísraela fyrir vopnahléi hafi verið orðum auknar. Hingað til hefur Hamas krafist þess að landamærin milli Egyptalands og Gaza verði opnuð - og að þeir á þeim forsendum gætu samþykkt lokun jarðgangna milli landanna og að erlendir eftirlitssveitir verði á vettvangi (tyrkneskar).

Hins vegar virðist ekkert benda til þess að Egyptar samþykki þetta, eða réttara að Ísraelar leyfi þeim að opna landamærin fyrir Palestínumönnum en þau hafa verið lokuð lengi að kröfu Ísraela. 

Það sem vekur furðu mína er að enn sé verið að reyna að fá Hamas til að fallast á skilyrði Ísraela án þess að Palestínumenn sjálfir fái nokkur af sínum baráttumálum framgengt.

Samt er alþjóðasamfélagið búið að fordæma árásir Ísraela og krefjast þess að þeim linni strax og að herinn fari frá Gaza.

Ef Hamas samþykkir skilyrðin má segja að þeir hafi viðurkennt algjört afhroð í átökunum og að sigur Ísraela sé afgerandi.

Er það eitthvað sem alþjóðasamfélagið er í raun að stefna að, þrátt fyrir ályktun Sameinuðu þjóðanna? Af hverju er Ísrael ekki sett einhver skilyrði líka?

Hamas sagt hafa fallist á vopnahlé