Tveir íslenskir leikmenn að fá góða samninga ytra

Tveir þeirra íslensku knattspyrnumanna sem leikið hafa ytra undanfarin ár, en ekki hlotið náð í augum landsliðsþjálfarans (og reyndar ekki heldur fyrri þjálfara sem heitið geti) voru að fá fína samninga eins og segir hér á mbl.is (Haraldur Guðmundsson og Hjálmar Jónsson).

Báðir þessir leikmenn eru örvfættir og leika í stöðum sem gamli jálkurinn Hermann Hreiðarsson hefur einokað hjá íslenska landsliðinu síðustu árin. Hermann hefur eins og kunnugt er vermt bekkinn hjá Portsmouth í allan vetur og fær nú ekki að fara frá félaginu þrátt fyrir tilboð í hann frá liðum í 1. deildinni ensku.

Ef menn telja að sænska og kýpversku deildirnar séu eitthvað lélegar, þá má minna á að Gautaborg er eitthvað frægasta knattspyrnufélag í heimi - vann til dæmis UEFA bikarinn árið 1982 undir stjórn Sven Göran Eriksson og er núna sænskur bikarmeistari (sænskur meistari árið áður). Kýpverjar eru að gera það gott, ekki aðeins félagslið þeirra heldur einnig landsliðin. Skemmst er að minnast þess að 18 ára landslið Íslands tapaði báðum leikjunum gegn Kýpur á Evrópumótinu í fyrra (en stóð sig annars þokkalega).

Vonandi fá báðir þessir leikmenn fleiri tækifæri með landsliðinu en þeir hafa fengið hingað til. Þeir eru báðir mjög teknískir og með fínar sendingar. En líklega skipta vel spilandi varnarmenn ekki miklu máli í augum landsliðsþjálfarans. Betra er að hafa tudda eins og Hermann í liðinu þó hann geti aldrei komið bolta frá sér sómasamlega.

Hjálmar samdi á ný við Gautaborg

Athugasemdir

[Ingólfur Þór Guðmundsson, 17.1.2009 kl. 12:31]

Það hefur nú bara verið vaninn að ákveðnir leikmenn eru áskrifendur að sæti í Íslenska landsliðinu.

og skiptir þá núverandi og fyrrverandi landsliðsþjálfara engu hvort leikmaðurinn situr á bekknum stærsta hlutann af seasoninu.

Ef leikmaður er búsettur í Englandi, óháð getu, þá er hann sjálfkrafa kominn í landsliðið. Jafnvel þó hann spili ekki fótbolta, því búsetan ein skiptir öllu máli.

Langflestir af okkar sterkustu mönnum hafa komið frá liðum í Skandinavíu og Hollandi, þeir sem til að mynda hafa farið beint til Englands, hafa iðulega komið með skottið á milli lappanna, og farið að spila með Fylki og öðrum miðlungsliðum á Íslandi, svo dæmi sé tekið.

Hjálmar Jónsson hefur ekki hlotið náð hjá íslenska landsliðinu , sem er miður. En það sama má segja um aðra sterka leikmenn í norrænum deildum. Þeir spila 35-40 leiki á tímabili, og svo eru einhverjir bekkjarsetumenn valdir framyfir þá, með minna en 10 leiki á seasoni.