Gríðarlegar olíulindir???

Þessi Moggafrétt er með eindæmum og gott dæmi um ábyrgðarlausan fréttaflutning blaðsins þegar umhverfismál og stóriðja er annars vegar.

Hér er forstjóri norsku olíustofnunarinnar einungis að segja að til þess að réttlæta borun og starfsemi svo langt frá landi eins og Drekasvæðïð er, þá þurfi að vera fyrir hendi líkindi fyrir eins stórum lindum og í Norðursjó þar sem helstu olíulindir Norðmanna eru.

Hér eru því engar "getgátur um gríðarlegar olíulindir" að ræða, heldur einungis verið að ræða um hvað þurfi til að hefja starfsemi á þessum stað.

Fréttaflutningurinn hér í Noregi af þessu máli er allur annar. Þar kemur fram að olíumálaráðherra Norðmanna var á Jan Mayen nú í vikunni til að kanna aðstæður fyrir olíuleit þar. Fjölmiðlar hér telja að þetta sé sjónarspil norskra stjórnvalda vegna hugmynda Íslendinga um olíuleit á Drekasvæðinu. Vonandi er þetta ekki upphaf að olíukapphlaupi á Jan Mayan-svæðinu þar sem náttúran á svæðinu verður fórnarlambið.

Norsk náttúruverndarsamtök vilja stoppa báðar þessar hugmyndir og vara við slíkri tilraunastarfssemi á slíku óveðurssvæði sem Drekasvæðið er. Slíkt sé eins og að spila rússneska rúllettu með náttúru svæðisins, sjá http://www.nrk.no/nyheter/distrikt/troms_og_finnmark/1.3787335ar

Meira að segja norska umhverfismálaráðuneytið varar við þessum hugmyndum, um að opna nýtt leitarsvæði sem þetta svona langt frá landi.

Athygli vekur að ekkert heyrist frá íslenska umhverfisráðuneytinu vegna þessa máls og íslensk umhverfissamtök virðast þegja þunnu hljóði. Hvað veldur??

 

Getgátur um gríðarlegar olíulindir á Drekasvæðinu

Athugasemdir

[Jón (IP-tala skráð) 25.9.2009 kl. 10:01]

Sammála þessu. Norsk yfirvöld eru greinilega að bregðast við íslensku leitarheimildunum, því það voru engar áætlanir um olíuleit á þessu svæði. Enginn veit í dag hvort það sé olía þarna yfirhöfuð og jafnvel þótt það reynist vera olía þarf það að vera meiriháttar fundur til þess að það geti borgað sig að vinna hana. Norðmenn vilja bara sýna andlit gagnvart íslendingum til þess að tryggja sína stöðu og rétt. Eins er hugsanlegt að þetta sé eitthvert innhússspil í norskum stjórnmálum. Þeir reikna heldur ekki með neinni vinnslu þarna næsta áratug ef það verður nokkurn tíman.

Það er sjálfsagt fyrir íslendinga að reyna að komast til botns í því hvort það sé olía þarna og hvort það sé arðbært að vinna þessa olíu. En ég held að menn ættu að stilla væntingar sínar, og svo má gera úr því skóna að það liggi ekkert á því að pumpa upp olíu, því olía mun verða miklu verðmætari í framtíðinni, svo fremi sem norðmenn hafi ekki tæmt allt fyrst.

[Jón Ásgeir Bjarnason, 25.9.2009 kl. 10:23]

Norðmenn eru latir, gráðugir, gáfaðir og ekki góður stóri bróðir.

Það er alla vega mín reynsla!  Eitthvað gott og eitthvað slæmt eins og gengur!

Þeir eru að festa í sessi kerfi þar sem fjórði hver vinnufær maður er lifir á bótum frá ríkinu.  Þetta geta þeir vegna þess að þeir eru fimmti stærsti olíuútflytjandi heims.  Þeir þurfa samt að reyna að finna meira ef þeir eiga að halda í hofinu.

Það er auðvitað skömm að þeir ráði yfir Jan Mayen, en passar vel við stórveldisdrauma þeirra.  Einhverra hluta vegna þola þeir ekki að vel gangi á Íslandi.  Eins og hjálp þeirra í núverandi kröggum sýnir.  Þeir eiga eftir að hlaupa til og bora, ef eitthvað rætist úr hérna megin. 

Það er bara svoleiðis, því miður.  Náttúruvernd og Noregur, er eins og heitur matur í skólum.  Hann breytist í epli og banana.

[Bjarki (IP-tala skráð) 25.9.2009 kl. 11:24]

Þetta eru furðuleg komment gagnvart Norðmönnum. Það hefur legið fyrir samkomulag Noregs og Íslands um skiptingu mögulegra olíuauðlinda á svæðinu í mörg mörg ár og það er fráleitt að líta þannig á málið að það snúist um það að verða á undan norðmönnum að pota niður rörum í hafsbotninn. Þeir eru ekki að fara að sjúga upp neitt sem er réttilega okkar. Þvert á móti eru það mjög jákvæðar fréttir ef þeim gengur betur en okkur að fá olíuleit í gang sín megin við línuna, ef eitthvað finnst þar þá verður það augljóslega mun auðveldara fyrir okkur að koma íslenska drekasvæðinu á framfæri. Annars er þetta allt langt í framtíðinni, í besta falli eru 15-20 ár þangað til að íslenska ríkið fer að hala inn verulegum skatttekjum af svæðinu.

[Torfi Stefánsson (IP-tala skráð) 25.9.2009 kl. 12:18]

Ég er nú sammála því að hér eru Norðmenn með sjónarspil. En eins og menn vita um olíu þá er hægt að tæma olíulindir nágrannans með því að vera fyrri til að bora. Þetta er sameiginlegur hryggur og miklu handhægara fyrir Norðmenn að vinna þetta út frá Jan Mayen en okkur út frá Bakkafirði!

Hins vegar skil ég þessa frétt alls ekki, því ekkert fyrirtæki er tilbúið að leita eftir olíu fyrir okkur á Drekasvæðinu. Eina fyrirtækið sem sótti um boranaleyfi hefur dregið sig út úr dæminu - enda eflaust ekki eftir miklu að slægjast.

Þá vekur athygli að íslensk stjórnvöld skuli hafa slíka draumóra þegar meira að segja umhverfissóðar eins og Bandaríkjamenn voru að fella frumvarp sem átti að leyfa stórfellda olíuleit úti fyrir stöndum USA.

Hvar erum við Íslendingar eiginlega staddir í umhverfismálum? Aftast á merinni?

Og hvernig er með Vinstri græna í þessari ríkisstjórn. Leyfa þeir Samfylkingunni að ráða algjörlega ferðinni í öllum málum, einnig í einu höfuðmáli sínu, umhverfismálunum?

[bpm (IP-tala skráð) 25.9.2009 kl. 12:40]

olía er miklu frekar að finna í Ísafyrði þar er sprunga sem liggur alveg yfir til grænlands   og þverar olíulindir sem þar er búið  að finna og mikið er skrítið ef olía leitar ekki eftir sprungunni

bora í botni isafjarðar þar sem sprungan kemur í land sést vel á googleloftmynd og sjá hvað skeður annað eins hefur verið bruðlað eins og að stinga niður bor og bora 4 km holu