Enn ein ekki-frétt

Merkilegar eru margar (ekki-)fréttirnar hjá mbl.is hvað varðar fótboltann og er ástæða til að velta ástæðunni fyrir sér.

Núna er þessi frétt um gamlingjann Henrik Larsson, sem má muna sinn fífill fegurri, og er eflaust ein helsta ástæða þess að Svíar komust ekki á VM (já eða þjálfarinn sem valdi hann alltaf í liðið, sama hversu lélegur hann var orðinn).

Aðalfréttin í dag í sænska boltanum, er hins vegar árangur Gautaborgar - og Íslendinganna í liðinu, frétt sem Mogginn sér ekki ástæðu til að fjalla um (þrátt fyrir að þar komu þrír Íslendingar við sögu).

Gautaborgarliðið, sem er núverandi bikarmeistari og lenti í 2. sæti deildarinnar í fyrra, er í harðri baráttu við AIK um sænska meistaratitilinn (aðeins einu stigi á eftir AIK þegar 3 umferðir eru eftir).

Liðið vann ótrúlegan (heppnis)sigur á Malmö FF í Malmö í gærkveldi og bjargaði Ragnar Sigurðsson marki á ævintýralegan hátt. Hann fær hæstu einkunn liðsins fyrir frammistöðu sína í vörninni, eða 7. Hjálmar Jónsson spilaði einnig vel og fær mikið hrós fyrir góða frammistöðu í sumar og haust með liðinu. Tá átti Theódór Elmar Bjarnason sendinguna sem leiddi til sigurmarksins.

Sjá http://www.svenskafans.com/fotboll/artikel.asp?id=321197

Þessir þrír menn hafa ekki átt upp á pallborðið hjá íslenska landsliðsþjálfaranum. Hjálmar hefur alls ekki fengið tækifæri, Elmar hætti að gefa kost á sér í landsliðið vegna óánægju með þjálfarann og Ragnar hefur yfirleitt setið á bekknum, þrátt fyrir frábæra frammistöðu með liði sínu.

Nú hefur landsliðsþjálfarinn fengið framlengingu á samingi sínum, til tveggja ára, þrátt fyrir yfirleitt óskiljanlegt val sitt á landsliðinu - og neðsta sætið í riðlakeppninni fyrir HM. Aðrir þjálfarar með slíkan "árangur" hafa hins vegar fengið að taka pokann sinn, á meðal sænski landsliðsþjálfarinn.

Já, ekki er metnaðurinn mikill heima á skerinu fyrir hönd landsliðsins, amk ekki hjá KSÍ og ekki hjá fjölmiðlunum. Mér finnst samt skrítið að ekki skuli heyrast gagnrýnisraddir vegna þessa og undrast þögn fjölmiðlanna og fréttaflutning, ekki síst mbl.is.

 

Henrik Larsson hættir í lok tímabilsins