Ögranir Bandaríkjamanna

21.7.2010 | 08:10

Merkilegt að upplifa aftur og aftur hótanir og ögranir af hálfu Bandaríkjamanna gagnvart meintum óvinum þeirra og ásakanir um árásargirni og fleira.

Einmitt þetta síðastnefnda var stefna USA og stuðningsþjóða þeirra í utanríkismálum í tíð Bush, eða offensiv stefna. Með komu Obama í embætti var í staðinn talað um samræðustjórnmál, dialog, en lítið hefur verið um efndir á því.

Stefna Obama, með haukinn Clinton í forsvari, verður æ árásargjarnari, nú síðast heræfingarnar á Kóreuskaganum og ferðalag Clinton og ráðamanna Suður Kóreu inn á hlutlausa svæðið milli Norður og Suður Kóreu. Það sýnir ekki vilja til samtals heldur mjög ákveðna ögrun.

Búast má við mjög auknum brotum á land- og lofthelgi Norður Kóreu í kjölfarið til að fá þá til að bregðast við og verða þá tilefni til árásar á landið. Virðist sem Bandáríkjamenn klæi í fingurna að nota eitthvað af þeim ógrynni kjarnorkuvopna sem þeir hafa yfir að ráða.

Annars er þessi árásargirni ótrúleg í ljósi þess að USA hefur verið að eyða meiri fjárhæð í hernaðarbrölt en nokkru sinni frá síðari heimsstyrjöld. Meira að segja Víetnamstríðið kostaði ekki eins mikið og herferðin gegn Islam hefur kostað.

Hvernig þeir hafa efni á þessu er auðvitað stór spurning - og það mitt í djúpri krepputíð.