Líklegt byrjunarlið?

Eftir tapleik Íslands gegn Noregi í fyrstu umferð EM hér heima á föstudaginn var hefði maður getað búist við breytingum á íslenska landsliðinu.

Fyrri hálfleikurinn hjá íslenska liðinu var þó þokkalegur, ekki endilega vegna þess hve liðið var að spila vel, heldur vegna þess hversu norska liðið var lélegt.

Þó mátti sjá í fyrri hálfleik tilhneigingu, sem varð svo mjög áberandi í þeim seinni, þ.e. að íslenska liðið féll mjög aftur og lenti stundum í nauðvörn. Ástæðan fyrir því var einkum sú að mínum mati að Veigar Páll, sem hafði haldið boltanum mjög vel og dreift spilinu, hvarf svo til í seinni hálfleiknum.

Þá kom einnig í ljós hversu takmarkaður leikmaður Aron Einar er en slök frammistaða hans á miðjunni í seinni hálfleiknum gerði að Norðmenn fengu að leika lausum hala. Samt virðist hann eiga að vera í byrjunarliðinu í dag, og þrátt fyrir að við eigum ágætis mann í stöðu hans, þ.e. Ólaf Inga Skúlason.

Þá komu vandamál í vörninni berlega í ljós í seinni hálfleik, einkum hjá Sölva Geir og Kristjáni Erni en samvinna þeirra var ekki sem skyldi í hálfleiknum. Svo virðist samt sem þeir eigi enn að mynda miðvarðarparið.

Sölvi er auðvitað tiltölulega óreyndur ennþá - og var settur út úr liði FCK í fyrri leik liðsins gegn Rósenborg, eflaust mikið til þess vegna. Þá hefur Kristján Örn ekki spilað miðvörð síðan hann var seldur frá brann til Hönefoss, heldur hægri bakvörð þar sem mér finnst hann eiga heima - og setja Ragnar Sigurðsson í miðvarðarstöðuna í staðinn.

Að lokum þá átti Jóhann Berg frekar afleitan dag gegn Norðmönnum, einkum í seinni hálfleik. Svo virðist sem hinn ungi og óreyndi Gylfi Sigurðsson eigi að taka hina mikilvægu stöðu Veigar Páls á miðjunni en mér finnst nær að láta hann leika vinstra megin í stað Jóhanns og nota Veigar áfram.

Þá klikkaði Gunnleifur illa í jöfnunarmarkinu gegn Norðmönnum svo mér finnst eðlilegt að leyfa Árna Gaut að spreyta sig í staðinn:

Mitt lið!:

Árni Gautur Arason

Kristján Örn Sigurðsson, Sölvi Geir Ottesen, Ragnar Sigurðsson, Indriði Sigurðsson

Ólafur Ingi Skúlason, Eggert Gunnþór Jónsson

Rúrik Gíslason, Veigar Páll Gunnarsson, Gylfi Þór Sigurðsson

Heiðar Helguson

Árni Gautur verður í hópnum