Kominn tími til að leyfa Arnóri að spreyta sig á miðjunni

Það er sannarlega kominn tími til að leyfa Arnóri Atlasyni að spreyta sig sem leikstjórnanda hjá landsliðinu í stað Snorra Steins Guðjónssonar, enda er hann aðalleikstjórnandi AGK í dönsku deildinni meðan Snorri Steinn er þar aðeins varamaður. Þetta sáu íslenskir sjónvarpsáhorfendur greinilega í síðasta leik liðsins þar sem Arnór spilaði á miðjunni og skoraði þaðan öll mörk sín sem sýnd voru í sjónvarpinu.

Í íslenska landsliðinu er þessu öfugt farið. Þar spilar Snorri Steinn nær alla leiki (allan leikinn) á miðjunni á meðan Arnór er nær eingöngu notaður í skyttuhlutverkinu vinstra megin á móti Aroni Pálmarsyni - og þarf oftar en ekki að sitja á bekknum.

Þetta val Guðmundar landsliðsþjálfara er einkar óheppilegt fyrir íslenska landsliðið því það bitnar ekki aðeins á sóknarleiknum (Snorri skorar varla með uppstökki fyrir utan eins og flestir vita) heldur einnig á varnarleiknum. Meðan Arnór er einn okkar besti varnarmaður þá er Snorri einn okkar sísti - og iðulega skipt út af eftir sóknir liðsins.  Sama á við um Róbert Gunnarsson. Því þarf íslenska landsliðið að skipta tveimur mönnum út í vörn og sókn - og það notfærðu andstæðingar okkar sér mjög í lokaleikjum HM nú í janúar.

Íslenska landsliðið er í mikilli hættu á að komast ekki áfram í undankeppni EM. Því er þörf á róttækri breytingu á skipulagningu liðsins í leikjunum sem eru framundan (gegn Þjóðverjum og Austurríkismönnum). Sjálfsögðust og eðlilegasta breytingin er að setja Snorra á bekkinn og nota Arnór sem leikstjórnanda.

Arnór með 9 mörk