Mikið skrifað um Íslendinga í norskum blöðum fyrir landsleikinn

Norðmenn hafa greinilega miklu meiri áhuga á landsleiknum á föstudaginn kemur en Íslendingar. Norsku blöðin skrifa mikið um íslenska liðið - og leikmennina - og yfirleitt á mjög jákvæðum nótum.

Svo virðist sem íslenska landsliðið sé komið til Noregs og þegar æft þar, því sagt er frá æfingunni og góðri frammistöðu Veigar Páls á henni, í viðtali við hann á einum netmiðlinum (aftenposten.no). Þar er sagt frá frábærri frammistöðu Veigars í Noregi (allt frá 1995) og velt vöngum yfir því af hverju hann hefur ekki fengið að spila meira með íslenska landsliðinu. Ekki er þó búist við að hann byrji inn á í leiknum.

Þá er sagt frá því að Start hefur samið við Keflvíkinginn Harald Frey, rifjuð upp vera hans í Noregi áður (með Álasundi) og að hann sé leiðtogatýpa sem ætlað sé að bjarga Start frá falli.

Einnig er sagt frá Guðmundi Reyni og viðtal haft við hann, en ekkert minnst á mislukkaða veru hans hjá Norrköping.

Auk þess er fínt viðtal við Stefán Magnússon, markmannl andsliðsins (og Lilleström), rætt um tattóið hans (íslenska skjaldarmerkið), áttjarðarást og skrautlegan feril.

Þá er sagt frá því að sólarinn (driplefanten) Steinþór Þorsteinsson hjá Sandnes hafi verið valinn í íslenska landsliði.

Landsliðsþjálfari norska liðsins, Drillo, hrósar íslenska landsliðinu í hástert en bendir á að það tapi yfirleitt jöfnum leikjum einhverra hluta vegna, og furðar sig á því hversu aftarlega liðið er á stigalista FIFA.

Þá hrósar fyrirliði norska landsliðsins og leikmaður Fulham, Brede Hangeland, íslenska liðinu og býst við erfiðum leik.

-----

Að lokum má nefna að mikið er um forföll hjá norska 21 árs liðinu gegn Íslandi eftir viku.

Þeir sem verða ekki með eru Håvard Nordtveit (Mönchengladbach) sem spilar með A-landsliðinu, Fredrik Semb Berge (Odd Grenland), Jo Inge Berget (Molde), Magnus Wolff Eikrem (Molde), Markus Pedersen (Vitesse) og Simen Wangberg (Rosenborg).

Sérstaklega er gott fyrir íslenska liðið að vera laus við sóknarparið Berget og Pedersen. 

Í stað þeirra koma Amin Nouri (Start), Jørgen Hammer (Stabæk), Muhamed Keita (Strøms­godset), Mushaga Bakenga (Rosenborg), Yann-Erik de Lanlay (Viking) og Etzaz Hussain (Fredrikstad). Sérstaklega Keita og Bakenga eru öflugir leikmenn með mikla reynslu.

Guðmundur Reynir hjá Brann