Vinsælli ytra en hér

Þetta um frammistöðu Hjálmars Jónsson með liði Gautaborgar er lyginni líkast, ekki síst í ljósi þess hversu lítið traust er borið til hans hér heima.

Samkvæmt heimasíðu KSÍ (sem þó er með misvísandi upplýsingar) á hann annars vegar 18 landsleiki á árunum 2002-2007, eða 9 landsleiki á árunum 2002-2004. Seinna yfirlitið virðist reyndar aðeins ná til 2004 svo það fyrra er líklega réttara.

Eins og kemur fram í frétt Moggans þá varð Hjálmar Svíþjóðarmeistari með Gautaborg árið 2007 (síðasta árið sem hann var valinn í landsliðið!) og bikarmeistari 2008 (en ekki valinn í landsliðið þá og aldrei síðan!!!).

Hjálmar átti í vandræðum með að komast í lið Gautaborgar í fyrra (2010), en eftir að Ragnar var seldur þá hefur hann verið fastamaður í liðinu og blómstrað. Hann er meira að segja kominn í nýja stöðu, í miðvörðinn, í stað vinstri bakvarðar sem hann spilaði lengstum eins og kunnugt er.

Hjörtur Logi Valgarðsson hefur meira að segja þurft að sætta sig við bekkjarsetu í liðinu seinni hluta mótsins í ár, m.a. vegna góðrar frammistöðu Hjálmars.

Samt leit landsliðsþjálfarinn aldrei í áttina til Hjálmars alla þjálfunartíð sína, en valdi í staðinn hinn löngu útbrunna leikmann Hermann Hreiðarsson og svo 21 árs landsliðsleikmanninn Hjört Loga undir lokin (þrátt fyrir bekkjarsetu hans).

Voandi fáum við að sjá til Hjálmars aftur í landsliðinu með nýjum og betri þjálfara.

Hjálmar 11. árið með Gautaborg