Dapur fyrri hálfleikur

Þetta er nú með daprari leikjum sem maður hefur séð. Íslenska liðinu munar svo sannarlega um að hafa Theodór Elmar ekki inná, ef maður miðar við fyrri leikinn.

Þá er sá sem leysir hann af, Haukur Heiðar, búinn að vera mjög slakur, seinn og klaufalegur, og var heppinn að fá ekki á sig annað víti.

Ljósu punktarnir eru Hólmbert frammi (ógnar miklu meira en Jón Daði) og Jón Guðni í vörninni.

Vonandi verða gerðar róttækar skiptingar í seinni hálfleik þar sem Haukur, Hörður, Rúnar, Jón Daði og Þórarinn verða fljótlega teknir útaf.

Leikir sem þessir telja nefnilega alveg eins mikið og alvöruleikir hvað röðun á stigalista Fifa varðar - og þannig þægilegri drátt í undankeppni næsta stórmóts.

 

Ísland og Kanada skildu jöfn

Athugasemdir

[Torfi Kristján Stefánsson, 19.1.2015 kl. 23:15]

Ekki var seinni hálfleikurinn betri! Greinilega B-lið þjóðanna þarna á ferð. 

Ég set þó spurningarmerki við skiptingarnar og valið almennt á liðinu. Alltof margar breytingar - og má benda á að Kanandamenn voru með svo til sömu byrjunarlið í báðum leikunum. Það var eins og vantaði metnað hjá íslensku þjálfurunum til að vinna leikinn.

Þrjár skiptingar í hálfleik, tvær eðlilegar. Matthías inná fyrir Jón Daða sem varla hafði komið við boltann í fyrri hálfleik (yfirleitt kemur hann reyndar sjaldan við boltann, hleypur bara. Það þykir þjálfurunum voða gott) og Guðlaugur Victor í stað Rúnars Más. Sú þriðja var hins vegar sér­kenni­leg. Rúrik útaf og Elías Már inná! Næsta skipting, sem var á 61. mín, var einnig nokkuð sérstök, ekki vegna þess hver fór útaf (Þórarinn Ingi) heldur hver kom inná, þ.e. Ólafur Finsen. Reyndar virðist prinsipið vera það að þeir sem spiluðu minnst í fyrri leiknum (Elías og Ólafur) fengu núna meira að spreyta sig. Þá var Guðmundur Þórarinsson sem átti fínan leik, tekinn útaf á 74. mín og inn kom Björn Daníel Sverrisson.

Sá útileikmaður sem spilaði einna minnst samanlagt í báðum leikjunum, var Kristinn Steindórsson, þrátt fyrir markið sem hann skoraði í fyrri leiknum. Hann fékk ekkert að vera með í seinni leiknum. Skrítið.