Lokum hringveginum sunnan Vatnajökuls!

Ekki veit ég hvort þessi mikli fjöldi fólks hafi komið á fyrirlesturinn vegna þessa manns, eða vegna áhuga á gosinu. Ég tel reyndar einsýnt að það hafi verið vegna þess síðarnefnda þó svo að Ármanni þessum hafi mjög verið hampað í fjölmiðlum allt frá gosbyrjun - og reyndar einnig í Eyjafjallajökulsgosinu.

Það er nefnilega svo gaman að sjá mann að vinnu á vettvangi, með öskulagið framan í sér og ófrýnilegan sem mest má vera. Við skulum samt vona að hann hafi verið skár útlítandi á fyrirlestrinum í gær.

Ekki mætti ég á staðinn þrátt fyrir mikinn áhuga á þessu gosi. Ástæðan er sú að ég hef það á tilfinningunni að það sé ekki ást á vísindunum eða á sannleikanum sem drífur Ármann Höskuldsson áfram. Heldur sé það fyrst og fremst einhvers konar lobbýismi - til að fá enn meiri styrki til rannsókna á gosinu - og því sé allt í lagi að ýkja svolítið.

Ýkjurnar snerust fyrst um hina hræðilegu yfirvofandi hættu á hamfarahlaupi í Jökulsá á Fjöllum sem gerði það að verkum að allt vatnasvæði fljótsins var í fyrstu yfirlýst hættu- og bannsvæði - og er svo enn að hluta.

Nú virðist það ekki vera nóg að mati Ármanns, heldur leggur hann alla sandana sunnan Vatnajökuls undir að auki og gengur svo langt að fullyrða að hlaup úr Bárðarbungu gæti skollið á sandana á um 15 til 20 mínútum. Hér gengur hann enn lengra en þegar hann lýsti því yfir að hlaup í Jökulsá á Fjöllum gæti skollið á vatnasvæðið þar á nokkrum klukkutímum. Þessu trúðu almannavarnir og lokuðu svæðinu snarlega fyrir allri umferð!

Af hverju þá ekki að loka líka hringveginum á söndunum neðan Vatnajökuls fyrst hættan er enn meira þar, getur skollið á með miklu minni fyrirvara?

Við skulum svo ekkert vera að spá í því að mjög hafi dregið úr gosinu í Holuhrauni og skjálftavirkni í Bárðarbungu minnkað mikið undanfarið.

Það gæti orðið til þess að duglegir jarðvísindamenn eins og Ármann Höskuldsson fengju minni fjárveitingar á næstu fjárlögum fyrir sínar brýnu rannsóknir!

 

Hvernig á að réttlæta hverjir farast?

Athugasemdir

[Torfi Kristján Stefánsson, 17.2.2015 kl. 19:14]

Ég hef greinilega misskilið þessi orð Ármanns um sandana. Kannski hafa fleiri gert það? 

Í Speglinum á Rás 1 núna í kvöldfréttatímanum var viðtal við meistarann þar sem kom óbeint fram að með þessu orði, "sandana", átti hann við sandana norðan Vatnajökuls! Reyndar hef ég aldrei heyrt talað um sandana þar enda ekki kunnugur á svæðinu. Hins vegar hef ég heyrt og séð talað um flæðurnar þarna sem ég held að sé mun algengara.

Hvað sem því líður þá er ljóst að jarðvísindamaðurinn er enn með hamfaraspá í huga og enn meira nú þegar dregur úr gosinu. Hann gleymir því greinilega, eða lætur svo, að það dregur ekki aðeins úr gosinu heldur einnig úr skjálftunum í Bárðarbungu sem er sterk vísbending um hvað er að gerast í öskju þess. Þar er að komast á jafnvægi sem dregur mjög úr líkum á gosi þar.

Að auki er Ármann að tala um möguleika á gosi öðru hverju í 10 ár - rétt eins og var í Kröflu. Er hann þar með að meina að svæðið við Holuhraun eigi að vera lokað í 10 ár í viðbót - því allur sé varinn góður?