Hlýtt eða kalt?

Í yfirlitinu frá Veðurstofunni kmeur fram að meðalhiti í Reykjavík í júlí var 11,3 stig, 0,8 stigum yfir meðallagi áranna 1961 til 1990, en -0,8 stigum undir meðallagi síðustu tíu ára. Hann var 46. hlýjasti júlímánuðurinn í sögu mælinga í 145 ár, eða vel yfir meðaltalinu!

Ef mánuðurinn er borinn saman við sama mánuð það sem af er öldinni kemur í ljós að júlí í ár er í hópi þeirra hlýrri:

Á þessari öld var kaldara í Reykjavík árin 2000 (10,7), 2001 (11,1), 2002 (10,2), 2005 (10,5), 2007 (11,0) og 2013 (10,9).

Árið 2006 var svipaður hiti (11,4 stig), einnig árin 2008 (11,5), 2009 (11,3), 2011 (11,2) og 2014 (11,4).

Árið 2003 var mun hlýrra (12,8) og einnig árin 2004 (12,6), 2010 (12,1) og 2012 (12,3).

Þetta gerir sex kaldari júlímánuði á öldinni, fimm svipaða en fjóra hlýrri. Sem sé í góðu meðallagi á þessari öld, sem hefur slegið öll met í hlýindum það sem af er!

Svo ekki sé talað um sólskinið í Reykjavík sem mældist í 225,5 klukkustundir. Það er heilum 54 stundum yfir meðallagi áranna 1961 til 1990 og 30 stundum yfir meðallagi síðustu tíu ára (fleiri síðast 2009).

Veðri misskipt það sem af er sumri