Ótrúlega stoltur af gamla liðinu?

Eftir tapið gegn Ungverjum eru auðvitað tímamót, þó svo að fyrirliði íslenska landsliðsins neiti því - og þó að „hlýðum Víði“ sé ótrúlega stoltur af hugarfari leikmannanna! Liðið kemst ekki á EM og er auk þess fallið niður um deild í Þjóðadeildinni. Því er kominn tími á uppstokkun, bæði í landsliðshópnum og í þjálfaramálum. Í landsliðinu eru fastamenn sem hafa leikið saman til fjölda ára en ekki náð almennilegum árangri síðan 2016 eða í fjögur ár. Margir þeirra eru komnir vel á fertugsaldurinn og sumir komnir heim úr atvinnumennsku. Aðrir fá lítið að spila með félagsliðum sínum ytra þó svo að þau séu ekki í efstu deildinni.

Það má alveg nefna þessa leikmenn, lesendum til glöggvunar. Þeir eru Hannes Þór markmaður, miðverðirnir Kári Árna og Ragnar Sig, Aron Einar og Birkir Bjarnason – og svo varamennirnir Birkir Már og Ari Freyr. Birkir Bjarna er auðvitað alveg sér á blaði. Hefur mörg undanfarin ár verið að spila lítið með félagsliðum sínum en samt alltaf valinn í landsliðið og m.a.s. yfirleitt spilað leikina allt til enda. Í leiknum gegn Ungverjum var þetta átakanlegt. Maðurinn í engri leikæfingu og var gjörsamlega búinn á því í seinni hálfleiknum en var samt ekki skipt útaf!

Danir voru hins vegar að leika með vara-varaliði sínu gegn velskipuðu liði Svía og unnu frekar þægilegan sigur 2-0. Þeir voru nefnilega svo heppnir að fyrst forfölluðust margir af fasta­mönnunum, þeir sem eru að spila á Englandi, og svo kom upp veira í landsliðshópnum þannig að þeir „neyddust“ til að velja menn sem eru að spila heima og í hörkuformi. Það skilaði sér sem sé í sigri sem hefði verið óviss ef fastamennirnir, sem yfirleitt sitja á bekknum hjá félagsliðum sínum, hefðu verið með.

https://www.dr.dk/sporten/fodbold/landsholdet/afbudslandsholdet-viste-i-glimt-den-sverige-kamp-var-mere-end-bare-en

Af íslenska liðinu sem lék gegn Ungverjum, tel ég að aðeins Hörður Björgvin, Guðlaugur Victor, Rúnar Már, Gylfi Sig, Jóhann Berg og Alfreð eigi heima í nýju landsliði. Einnig varamennirnir Rúnar Alex, Sverrir Ingi, Albert Guðm og Jón Daði. Eins og sjá má þá er þetta reyndar ekki mikil endurnýjun, það næst næstum upp í heilt lið af mönnum sem hafa verið að spila með landsliðinu áður! Svo er menn í stóra hópnum sem eiga enn full erindi, eins og Hjörtur Hermanns, Hólmar Örn, Arnór Sig, Arnór Ingvi, Viðar Örn og svo ungu strákarnir í 21 árs liðinu, Mika­el og Jón Dag­ur.
Losum okkur því við gamlingjana og við þjálfarateymið! Ástandið getur ekki versnað við það.

Förum þá bara á HM