Valið á handboltalandsliðinu

Mér kemur valið á landsliðinu í handbolta nokkuð á óvart, rétt eins og ég hef lengi furðað mig á valinu á fótboltalandsliðinu.

Alfreð Gíslason velur ekki menn eins og Ragnar Óskarsson sem spilar sem fyrr í Frakklandi og var nýlega kosinn leikmaður mánaðarins í þeirri sterku deild. Þá velur Alfreð ekki Ronald Eradze í markvarðarstöðuna þó svo að karlinn sá hafi varið firnavel það sem af er Íslandsmóti.

Einnig vekur athygli að aðeins einn vinstri hornamaður er valinn í liðið, Björgvin Þorsteinsson.

Auk þess má nefna fjarveru Valdimars Þórssonar sem var að fá mjög fína dóma fyrir leik sinn með Malmö gegn hinu fornfræga Íslendingaliði í Lundi, Lugi.

Í stað þess eru menn eins og Hannes J. Jónsson, Björgvin Hólmgeirsson og Andri Stefán valdir.

Er landsliðsþjálfaranum farið að förlast? Leikirnir gegn Serbum nú í vor voru ekki sannfærandi og frammistaða liðs hans, Gummersbach, í þýsku deildinni það sem af er leiktíð er ekkert til að hrópa húrra fyrir. Markmiðið með að ráða Alfreð til liðsins var að gera það að meisturum en nú er það rétt fyrir ofan miðja deild. Þá er nú árangur Viggó Sigurðssonar með Flensborg í fyrra mun meira sannfærandi.

Þurfum við kannski einnig að losna við  landsliðsþjálfara handboltalandsliðsins?

Tveir nýliðar í landsliðshópi Alfreðs Gíslasonar

Athugasemdir

[Sindri hlíðar Jónsson (IP-tala skráð) 19.10.2007 kl. 18:48]

Nú gæti ég ekki verið meira ósamála þér.

Landsliði stóð sig með ágætum gegn gríðarsterkum serbum í vor, árangur alfreðs með félagsliði og landsliði talar fyrir sjálfan sig. Hreint frábær! Reyndar er Gummersbach ekki búna vera samfærandi  í þýskudeildini í haust en er búna spilla mjög vel í meistaradeildini , sem er keppni sem stjórn Gummersbach sagðist vilja vinna. Svo er tímabillið rétt að byrja.

 Með valið á liðinu neyðist ég að vera sammála þér með Roland Eradze og Ragna Óskars, mér finnst þeir vera  í landsliðklassa en meðan landsliðið stendur sig vel sé ég enga ástæðu til að kvarta.

[Torfi Kristján Stefánsson, 19.10.2007 kl. 19:26]

Gott að fá umræðu um þetta mál því menn hafa gagnrýnt Alfreð mjög lítið sem landsliðsþjálfara, eða sem þjálfara yfirleitt.

Við munum eflaust flest hvernig Viggó hrökklaðist frá landsliðinu eftir frábæran árangur með það og Alfreð ráðinn í staðinn með miklum væntingum. Ég man hins vegar ekki eftir að þær væntingar hafi ræst. Árangur íslenska landsliðins hefur verið frekar dapur síðan, nema þá sigurinn yfir Svíum ytra (og samanlagt).

Þá vil ég minna á að Alfreð var rekinn frá Magdeburg á sínum tíma vegna slaks árangurs. Ferill hann er því ekki eins glæstur og af er látið - og það gæti verið stutt í það að hann verði einnig látinn fara frá Gummersbach.

Auk þess er sérkennilegt að fylgjast með hvernig Alfreð notar (eða notar ekki) suma leikmenn sem ættu að geta verið og orðið lykilmenn í liðinu.

Fyrstan er að nefna Ragnar Óskarsson sem er eflaust einhver besti miðjumaðurinn í evrópskum handbolta. Hann hefur hingað til ekki fengið mikið að spila, og núna ekki einu sinni valinn, en Snorri Steinn, sem hefur átt mjög misjafna leiki, ávallt tekinn fram fyrir hann.

Þá er Roland auðvitað frábær markmaður og oft átt alveg stórkostlega leiki, líka með landsliðinu. Hann var ekki valinn í vor og ekki heldur núna þó svo að Alfreð hefði verið í lófa lagið að velja fjóra markmenn og láta þá skipta leikjunum tveimur á milli sín.

Einnig má nefna nýtinguna á Arnóri Atlasyni. Hann fékk sama sem ekkert að spila núna síðast á HM þrátt fyrir skyttuleysið vinstra megin - og ekkert síðan. Alfreð bar við slakri æfingu Arnórs en samt var þessi sami Arnór valinn maður ársins í danska boltanum á síðustu leiktíð, bolta sem alltaf er að verða sterkari og sterkari og stendur sig frábærlega í Evrópumótunum.

Ég leyfi mér því að fullyrða að Alfreð er ekki að velja rétta liðið og fær ekki heldur það út úr einstökum leikmönnum sem í þeim býr en eru þó valdir. 

Við höfum séð aðhaldið sem landsliðið í fótbolta er að fá frá áhugamönnum þar. Ég kalla á slíkt aðhald einnig hvað handboltann varðar. Annars er hætta að við drögumst einnig aftur úr á því sviði.