Spennandi riðill!

Yes! Það verður áframhald á keppni okkar manna meðal þeirra bestu, þ.e. riðill með Pólverjum og Norðmönnum eða Svíum um tvö sæti á ÓL.

Við hljótum að teljast líklegir til að komast áfram ef horft er til árangurs okkar liðs fyrir þetta NM mót. Svíar og Norðmenn virðast sterkari en við í dag, en voru það alls ekki fyrir ári síðan. Við hljótum að geta náð fyrri styrk, ekki síst með nýjum þjálfara og ekki eins háleitum markmiðum.

Ég hef skrifað það annars staðar að ég tel Aron Kristjánsson sjálfsagðan sem næsta þjálfara landsliðsins. Hann hefur mikla reynslu af keppni og þjálfun, ekki síst frá árunum í Danmörku, en Danir eru að verða allra sterkasta handboltaþjóð í heiminum í dag. Þeir hafa komist í undanúrslit í flestum stórmótum undanfarin ár og félagslið þeirra standa sig mjög vel í Evrópukeppnum. Hann getur þannig komið með nýjar hugmyndir og áherslur í þjálfun landsliðsins, sem ekki veitir af eftir hið staðnaða  tímabil Alfreðs.

Auðvitað kemur Viggó Sigurðsson enn til greina eftir hina frábæru frammistöðu hans með liðið 2005-2006 - og hin óheppilegu starfslok hans sem verður að skrifast á HSÍ-forystuna en ekki hann. En hætt er við að það verði ekki hægt þar sem sama forystan er enn við völd og ekki hlýtt þar á milli.

Ísland fer í erfiðan riðil í forkeppni Ólympíuleikanna í Póllandi