Liðið reynslulausa

Enn er landsliðsþjálfarinn við sama heygarðshornið, velur leikmenn í landsliðið sem lítið sem ekkert hafa spilað með félagsliði sínu. Sem dæmi má nefna Aron Einar Gunnarsson í Alkmaar en hann hefur ekkert fengið að spila með liði sínu í vor og ekki einu sinni setið á bekknum. Þetta lið er þó ekkert sérstakt, lenti í 12. sæti í hollensku deildinni. Á meðan hafa Kári Árnason og Rúrik Gíslason verið að spila vel með liðum sínum í Danmörku og Rúrik t.d. skorað í mark í tveimur síðustu leikjunum.

Þá er Arnór Smárason í Heerenveen valinn, nýstaðinn upp úr meiðslum sem hafa haldið honum úr liðinu þangað til í síðasta leik er hann kom inná undir lokin. Þarna er líka einn KR-ingur, Jónas Guðni Sævarsson, sem er í liði sem hefur ekkert sýnt enn í deildinni hér heima. Ytra eru hins vegar menn sem gæti komið í stað hans svo sem gamla kempan Gylfi Einarsson sem hefur verið að spila vel með norska meistaraliðinu Brann eða Eyjólfur Héðinsson hjá GAIS í Svíþjóð. Þá er Keflvíkingurinn Hólmar Örn Rúnarsson vænlegur kostur enda er lið hans á toppi deildarinnar.

Af hæpnu vali á varnarmönnum má nefna valið á Bjarna Ólafi Eiríkssyni í Val. Valsliðið hefur ekki verið sannfærandi í byrjun móts og vörnin sérstaklega ekki. Samt er Bjarni valinn en hlaut aldrei náð fyrir augum landsliðsþjálfarans meðan hann spilaði í 1. deildinni í Danmörku. Já það er gott að spila á Íslandi. Við höfum þó nokkra vinstri bakverði sem spila úti, svo sem Hjálmar Jónsson með sænsku meisturunum í Gautaborg, en hann hefur spilað alla leiki liðsins undanfarið og fengið fína dóma. Nei, meistaraliðið hér heima er betra en það sænska og Hjálmar því úti í kuldanum. Einnig má nefna Indriða Sigurðsson hjá Lyn.

Þá er annar Valsmaður í hópnum, Pálmi Rafn Pálmason, meðan menn eins og Veigar Páll Gunanrsson hjá Stabæk og Garðar Jóhannsson hjá Fredrikstad eru hvorugir í hópnum. Samt voru þessi menn valdir í lið vikunnar í Noregi, enda eru lið þeirra í tveimur efstu sætunum og Garðar skoraði tvö mörk í síðasta leik. Að þeir hvorugir séu með er auðvitað skandall, sérstaklega hvað Veigar Pál varðar.

Einnig vekur athygli að Gunnar Heiðar Þorvaldsson, Vålerenga, er í hópnum en hann hefur lítið sem ekkert fengið að spila með liði sínu á kepnnistímabilinu. Þá er Stefán Þórðarson með en hann fékk ekkert að spreyta sig í fyrra þótt hann stæði sig vel með sterku liði sem vann 2. deildina í Svíþjóð í fyrra. Já, það er gott að vera kominn heim.

Hins vegar er gaman að sjá Helga Val Daníelsson, Elfsborg, með í hópnum aftur eftir langt hlé sem og Eggert Gunnþór Jónsson, Hearts og Hannes Þ. Sigurðsson, Sundsvall.

Það vantar greinilega fleiri "útlendinga" í liðið hjá landsliðsþjálfaranum. Strákarnir í Hollandi eru búnir að fá að spreyta sig og ættu að fá hvíld (rétt eins og hjá liðum sínum ytra), sem og "Íslendingarnir" allir, en þeir sem spila mest úti - og með bestu liðunum - eiga skilið að vera valdir. 

Barcelona neitaði KSÍ um Eið Smára