Liðið loksins tilkynnt!

Jæja þá er loksins búið að tilkynna landsliðið í leikina gegn Norðmönnum og Skotum í byrjun september. Og loksins eru þeir Veigar Páll Gunnarsson og Indriði Sigurðsson valdir í landsliðið, svo við höfum þó eitthvað til að gleðjast yfir.

Viðbrögð bloggaranna hér á mbl.is eru þó frekar neikvæð, sérstaklega valið á Stefáni Þórðarsyni! Hann stóð sig jú vel með Nörrköping í fyrra en fékk engin tækifæri með landsliðinu, en nú eftir slaka frammistöðu með botnliðinu í efstu deildinni hér heima er hann valinn í liðið!

Einn bloggarinn gladdist yfir því að þjálfarinn væri að velja menn sem spila hér heima en ekki þá sem sætu á bekkjum liða sinna á Norðurlöndunum. Sá virðist ekki fylgjast vel með, því yfirleitt hafa þeir sem spila í Skandinavíu og verið valdir í landsliði verið lykilmenn í sínum liðum. Hins vegar voru menn sem sátu á bekkjum liða sinna í  Hollandi og Englandi iðulega verið valdir í landsliðið (Aron Gunnarsson, Arnór Smárason og Bjarni Viðarsson í Hollandi og Jóhannes Karl á Englandi).

Það eru aftur á móti fjöldi leikmanna sem eru fastamenn með bestu liðunum á Norðurlöndunum sem fá ekki tækifæri með landsliðinu. Má þar nefna Hjálmar Jónsson hjá Gautaborg sem spilar alla leiki með meistaraliði Svíþjóðar, Helga Val Daníelsson með Elfsborg sem nú er í næst efsta sætinu í sænsku deildinni (er reyndar meiddur núna) og Kári Árnason með AGF í Danmörku.

Mest er kvartað yfir valinu á framherjunum sem hvorki þykja góðir né í leikæfingu. Við höfum þó menn í ágætu formi úti sem ekki eru notaðir eins og Garðar Jóhannsson hjá Fredriksstad sem er í öðru sæti í norsku deildinni .Garðar hefur vakið mikla athygli og skorað mikið fyrir liðið þar til hann meddist fyrir skömmu en mun nú vera orðinn heill. Hannes Sigurðsson er að standa sig ágætlega með Sundvall, skorar mörk og spilar alla leiki. Þá er Kjartan  Finnbogason að gera það mjög gott, hefur skorað mark í öllum síðustu sex leikjum liðsins og vakið mikla athygli.

Vonandi gengur þessum, sem valdir voru, vel í leikjunum tveimur en ef ekki þá er .a.m.k. upp á þessa þrjá sóknarmenn að hlaupa.

Mér sýnist reyndar að landsliðsþjálfarinn hafi valið tvo meidda leikmenn í liðið, þá Ólaf Skúlason og Theodór Elmar, og þeim væntanlega ætlað að verma bekkinn allan leikinn (báða leikina reyndar). Af hverju ætli það sé gert?

Heiðar Helguson í landsliðinu