Flugfarþegar strandaglópar um alla Evrópu!

29.10.2008 | 10:10

Flugfarþegar strandaglópar um alla Evrópu!

Það eru ekki aðeins starfsmenn Sterling sem hafa verið féflettir heldur allir þeir farþegar sem hafa pantað far á næstunni með flugfélaginu og borgað það, sem og þeir sem eru búnir að kaupa farmiða, notað aðra leiðina og komast ekki til baka.

Fjölmiðlar í Danmörku eru uppfullir af fréttum og frásögum af reiðum farþegum út um allt. Svo snöggt var um félagið að stjórnendurnir voru ekkert að hafa fyrir því að tilkynna farþegum sem áttu far í dag að ekkert yrði flogið meira á vegum félagsins!

Það beið fjöldi manns á Kastrúp í morgun eftir flugi. Og ekki er hægt að hringja neitt til að fá upplysingar. Öll starfsemi er lögð af.

Já, enn eykst hróður okkar, ekki aðeins í Bretlandi heldur einnig í Danmörku. Það fer að vera erfitt að vera Íslendingur á erlendri grund.

Ég man eftir því, þegar ég var í námi í Svíþjóð á 9. áratugnum, að Svíar kölluðu okkur gyðinga Norðursins.

Með allri virðingu fyrir gyðingum þá held ég að það sé réttnefni og vel það.

Nú þurfa almenningstengslamenn og ímyndarsmiðir að fara að bretta upp ermarnar og finna einhver önnur lýsingarorð um okkur Íslendinga en að við einkennumst af áræðni og krafti.

Það er ekki víst að útlendingar kaupi það öllu lengur sem jákvæða lýsingu.