Breytinga þörf?

Á nokkrum mánuðum hefur íslenska karlaliðið í knattspyrnu fallið niður um u.þ.b. 35 sæti og er komið niður í það 110. Einungis Evrópuþjóðir eins og Færeyjar og Lúxemborg eru fyrir neðan okkur - og við ekki verið svona neðarlega frá því 2007 (eins og segir í fréttinni). Þá var ástandið með dapurlegasta móti hjá landsliðinu undir stjórn Ásgeirs Sigurvinssonar og Loga Ólafssonar. Þeir voru þá látnir fara blessaðir.

Í Fréttablaðinu birtist fyrir skömmu yfirlit yfir frammistöðu landsliðsins undanfarin ár í undankeppnum EM og HM, undir stjórn ýmra landsliðsþjálfara. Þar kom fram að frá árinu 1998 var árangurinn bestur hjá Guðjóni Þórðarsyni eða 50% (en hafði reyndar verið betri áður hjá þjálfurum eins og Bo Johansson og Ásgeiri Elíassyni). Síðan hefur stanslaust sigið á ógæfuhliðina. Næstur kom Atli Eðvaldsson með 41%, Ásgeir og Logi með 31%, Eyjólfur Sverris með 24% og nú síðast (en ekki síst) með Ólafi Jóhannessyni eða 14%.

Allir þjálfararnir eftir Guðjóni hafa verið látnir fara og það eftir svipað marga leiki eða 11-15 leiki, nema núverandi þjálfari. Hann hefur þegar stjórnað liðinu í 12 EM og HM-leikjum en virðist ekkert vera á leiðinni burtu.

Á fotbolti.net um daginn var gerð skoðanakönnun þar sem kemur fram eftirfarandi (spurningin var: hversu sátt(ur)/ósátt(ur) ertu með núverandi landsliðsþjálfara):

Mjög sáttir voru 11%. Frekar sáttir voru 44%. Frekar ósáttir voru 29% og mjög ósáttur 16%.

Þetta gerir 55% sátta en 45% ósátta. Mikið er langlundargeð knattspyrnuáhugamanna segir ég nú bara.

Það er spurning hversu lágt við eigum að lúta áður en gerðar verða breytingar á þjálfunarmálum liðsins. Næstu lið fyrir neðan okkur eru Kórea, Miðafríkulýðveldið, Súrinam, El Salvador, Kenýa og Kongó. Eigum við að bííða svo lengi að þau verði komin upp fyrir okkur?

Þess er eflaust ekki langt að bíða, eða til næsta leik sem er í mars (gegn Kýpur, sem gerði jafntefli við Portúgal á útivelli). Eða eigum við að nota tækifærið nú, við þetta fimm mánaða landsleikjahlé, og skipta um stjórnanda í brúnni. Svar mitt er já!

Ísland í 110. sæti á FIFA listanum

Athugasemdir

[Leifur Finnbogason, 20.10.2010 kl. 20:31]

Það er bókstaflega ekki hægt að reka Ólaf fyrir að "láta" liðið falla um 10 sæti við tapleik gegn Portúgölum, þegar hann fékk ekki einu sinni að velja í liðið einsog hann vildi. Þess fyrir utan var frábært að sjá til íslenska liðsins í tapleikjunum tveimur þaráundan, allt annað en í langan tíma. Fyrir þá leiki var Ísland í 79. sæti.

Engar áhyggjur, þú sérð Ísland á EM2016, hver sem þjálfar þá. Ekki aðeins verða U-21 mennirnir á frábærum aldri þá, heldur munu 24 þjóðir komast á mótið, 8 fleiri en 2012.

En...því miður, einsog ég sagði, það er ekki séns að hann verði rekinn fyrir Kýpurleikinn, og mjög líklegt að hann klári þessa undankeppni. Hvað gerist eftir það vil ég hinsvegar ekki veðja á.