Danir úr leik!!!

Þetta HM í Katar hefur boðið uppá athyglisverð úrslit sem sýna að Evrópuþjóðirnar eru að gefa eftir - ekki síst leikirnir í dag. Danir tapa fyrir Áströlum (og eru úr leik) og Frakkar fyrir Túnis!! Þá hefur Marokkó komið mjög á óvart með því að vinna Belga.
Mótið hefur verið mjög vel heppnað til þessa, leikirnir flestir spennandi og umgjörðin eflaust sú besta sem hefur sést hefur á HM nokkru sinni.

Samt er enn verið að fetta fingur út í að leikarnar séu haldnir í Katar og allt hið neikvæða tínt til en hinu jákvæða sleppt alfarið. Evrópuþjóðirnar (og Kaninn með helstu vinaþjóðum þeirra) hafa verið einkar duglegar við þetta enda er Katar ein af óþekku þjóðunum sem ekki fara alveg eftir línunni frá Pentagon.

Danir hafa ekki látið sitt eftir liggja og ætluðu í lengstu lög að spila með "one love" borða þó svo að áróður sé bannaður samkvæmt reglum Fifa (alþjóða knattspyrnusambandsins).
Engin virðing er borin fyrir menningu heimaþjóðarinnar enda eru hinir rétttrúuðu sannfærðir um yfirburði vestrænna "gilda" og leitast við að útbreiða þau með öllum tiltækum ráðum (helst með ofbeldi). Þetta minnir mikið á nýlendustefnu fyrri tíma þar sem kúgun á ríkjum í þriðja heiminum var réttlætt með útbreiðslu "kristinna" gilda (þ.e. trúboði). Það var auðvitað yfirskin til að blóðmjólka þessar þjóðir.

Og enn eru Vesturlönd við sama heygarðshornið. Danir til dæmis hafa tekið mikinn þátt í uppbyggingunni í Katar fyrir leikanna og grætt drjúgum á því - um leið og þeir tala um samfélagslega ábyrgð og stuðning við mannréttindi, ásamt fleiru.
Meira að segja danska utanríkisráðuneytið hefur tekið fullan þátt í að útvega dönskum fyrirtækjum verkefni í landinu.
Já, Danir, sem og önnur Vesturlönd, þykjast vísa veginn en fara hann svo auðvitað ekki sjálfir.
Hræsnin er alltaf söm við sig:

https://www.dr.dk/sporten/fodbold/vm/mens-dbu-fik-kritik-handler-danske-virksomheder-paa-livet-loes-i-qatar

 

Ástralir komnir í sextán liða úrslitin

Enn eitt sérkennilega valið hjá landsliðsþjálfaranum!

Þarna voru menn valdir í byrjunarliðið sem lítið fá að spila með félagsliðum sínum svo sem Þórir Helga (hefur ekkert spilað undanfarið) og Birkir Bjarna (sömuleiðis), Ísak Bergmann (lítið spilað) og Jón Dagur (lítið sem ekkert). Manni fyndist eðlilegra að Stefán Þórðar, Arnór Sigurðs og Mikael Anderson hefðu frekar fengið að byrja, því þeir spila reglulega með félagsliðum sínum. Þá hlýtur að teljast athyglisvert að Valgeir Lunddal var í byrjunarliðinu en ekki Alfons Sampsted.

Sjá má af fyrri hálfleiknum að lítil spilamennska áðurnefndra leikmanna kemur ekki aðeins niður á leik þeirra, heldur og á leik liðsins í heild. Fyrri hálfleikurinn var mjög slakur hjá íslenska liðinu gegn einu af lélegustu landsliðum í Evrópu.

Spurning var hvað þjálfarinn myndi gera í seinni hálfleiknum. Af fenginni reynslu mátti þó búast við að aðrir leikmenn, sem eru í lítilli eða engri leikæfingu, fengju að spreyta sig, menn eins og Mikael Ellerts og Andri Guðjohns! Það er nefnilega kostur í augum landsliðsþjálfarans að menn komi óþreyttir inn í landsliðsverkefnin!

Talandi um þjálfarann þá var hann ekkert að flýta sér að skipta inná í seinni hálfleiknum þrátt fyrir að ekkert væri að gerast í leiknum hjá íslenska liðinu. Það var ekki fyrr en á 62. mín sem fyrstu skiptingarnar fóru fram. Þá kom Arnór Sig loks inná sem og Mikael Anderson og svo einn af "köldu" mönnunum, Andri Guðjohns, fyrir annan "kaldan", Þóri Helga! Enn voru Jón Dagur og Birkir inná þrátt fyrir slaka frammistöðu. Þeir voru loks teknir útaf undir lok leiksins, Jón Dagur að vísu aðeins fyrr, og einn kaldur, Mikael Ellert, fyrir annan kaldan (Jón Dag)!

Já, það eru lítil batamerki hjá íslenska karlalandsliðinu í fótbolta undir stjórn þessa þjálfara. Enda varla von miðað við valið á liðinu og stjórnunina á því. 

Ísland í úrslit Eystrasaltsbikarsins eftir vítaspyrnukeppni

Tylliástæða til að taka fullan þátt í Úkraínustíðinu?

Eins og allir vita hafa Vesturlönd tekið óbeinan þátt í stríði Úkraínumanna gegn Rússum, með áður óþekktum fjölda af vopnasendingum og fjármunaaustri til úkraínskra stjórnvalda til að koma Rússum um koll, helst með það að markmiði að steypa Pútín og stjórnvöldum í Kreml - og losa þannig við óþægan ljá í nágrannagarði sínum.

Þetta hafa Vesturlönd, með Bandaríkjamenn, NATÓ og Evrópusambandið leikið fyrr og síðar, bæði í Evrópu (fyrrum Júgóslavíu t.d.) og í Miðausturlöndum nær (afskiptum af innanríkismálum í Afganistan, Írak, Lýbíu og Sýrlandi, yfirleitt með beinum innrásum eins og í Afganistan, Írak og Lýbíu).

Og nú skal tekið fullan þátt í stríðinu í Úkraínu með því að senda flugher og hermenn til að stríða gegn Rússum. (Tylli)ástæðan? Jú, árás á NATÓ-land, þ.e. Pólland, er samasem árás á öll Natólönd og verður svarað á sama hátt!
Áróðurinn fyrir beinum afskiptum er þegar hafinn eins og mátti sjá í kvöldfréttum Rúv nú áðan. Þennan áróður má meira að segja heyra í lýsingum á íþróttaviðburðum!!!

Það er auðvitað spurning af hverju Rússar eru að sprengja þetta nálægt Póllandi, vitandi um áhættuna. Ástæðan getur varla verið önnur en sú að vopnasendingar Vesturlanda til Úkraínuhers fari þarna í gegn. Þetta sé þannig tilraun Rússa til að eyðileggja þessi vopn, áður en þau verða notuð í stríðinu, vopn sem hafa gjörbreytt því og sett Rússa í mikinn vanda.

Og hvað með tylliástuna til að hefja stórfellda þátttöku í stríðsátökunum? Hvaða afleiðingar getur það haft í för með sér? Kjarnorkustríð? Kannski ekki.

Hins vegar er meira en líklegt að Kína muni ekki sitja hjá ef reynt verið að ganga milli bols og höfuðs á Rússum. Þá gæti þessi útþennslustefna NATÓ og Evrópusambandsins í austur orðið þeim dýrkeypt - sem og öllu mannkyni.

Er ekki kominn tími til að mótmæla þessum stríðsáróðri á Vesturlöndum og stríðsþátttöku vesturveldanna - og stigmagnandi átökum?
Hernaðaraðstoðin við Úkraínu hefur leitt til stighækkandi orku- og matvælaverðs í Evrópu og bitnað mest á almenningi en þeir ríkari - og þeir sem ráða málum - mata krókinn. Þetta hefur verið kallað græðgisbólga í stað verðbólgu og er auðvitað ekkert annað. Gósentíð kapitalistanna. En af hverju á saklaus almenningur að líða fyrir þetta bull?

Rússneskar flaugar drápu tvo í Póllandi

Skot á Kristrúnu, formann Samfylkingarinnar, eða bónorð?

Það var mikið hlegið á Landsfundinum þegar Bjarni Ben flutti stefnuræðu flokksins og nefndi það að Kristrún Frostadóttir hafi verið varamaður í skólanefnd Garðabæjar fyrir hönd Sjálfstæðisflokksins. En kannski voru þetta ákveðin skilaboð til flokksmanna um að Kristrún væri nú ekki svo langt frá Sjöllunum - og væri alveg til í samstarf með þeim, þvert á stefnu Samfylkingunnar undir stjórn Loga Einarssonar. 
Kristrún hefur jú lagt til hliðar tvö af helstu stefnumálum flokks síns, aðildina að Evrópusambandinu og nýja stjórnarskrá, og þannig nálgast Sjálfstæðisflokkinn mjög.

Einnig má geta þess að Kristrún hefur starfað hjá Viðskiptaráði, sem var helsti áróðursaðilinn fyrir útrásina og nýfrjálshyggjuna fyrir Hrun - og pantaði hina frægu skýrslu árið 2006 um að allt væri í þessu fína í íslensku fjármálakerfi og íslensku bankarnir stæðu mjög vel - þetta aðeins tveimur árum fyrir Hrunið.
Síðan starfaði hún hjá Kvikubanka sem er afsprengi MP-banka og eini starfandi banki landsins sem hafði bein tengsl við Hrunútrásina.

Nú er þessi nýfrjálshyggjukona orðinn formaður Samfylkingarinnar, sem sýnir augljósa hægrisveiflu flokksins, og er strax farin að daðra við íhaldið.
Spurning hvort við eigum von á nýrri Hrunstjórn og það fyrr en varir?

Alla vega er Sjálfstæðisflokkurinn til í nýtt frjálshyggjuævintýri ef marka má drög að stefnuskrá flokksins, sem hefur farið undarlega hljótt í fréttaflutningi fjölmiðla af landsfundinum. Einungis Kjarninn hefur bent á þetta í aðdraganda fundarins. Spurning hvort að formannskjörið sé ekki einfaldlega leikrit til að fela stefnuskrána, enda enginn málefnalegur munur á frambjóðendunum tveimur?

Hér má sjá hluta af drögum stefnuskárinnar, sem alveg örugglega verða samþykkt óbreytt:

https://kjarninn.is/skyring/lagt-til-vid-landsfund-sjalfstaedisflokks-ad-bankar-islandspostur-flugvellir-atvr-og-mogulega-ruv-verdi-selt/

 

 

Vorkennir flokksmönnum Samfylkingarinnar

Sérkennilegt útspil Katrínar

Það að vilja að Norðurlönd beiti sér fyrir kjarnorkuafvopnum skýtur mjög skökku við umræðuna í Svíþjóð og Finnlandi um þessar mundir vegna aðildarumsóknar þeirra í NATO.
Stjórnvöld í báðum þessum löndum hafa nefnilega gefið í skyn að þau gætu vel hugsað sér að leyfa kjarnorkuvopn í sínum löndum eftir að hafa gengið í Atlandshafsbandalagið, halda því allavega opnu.
Danir og Norðmenn hafa þegar leyft kjarnorkuvopnuð skip frá Bandaríkjunum að koma í sína lögsögu - og sterkur grunur leikur á að þau séu þegar í bækistöðum NATO í Noregi (og jafnvel við Bornholm), enda er fyrirsláttur þessara landa um að leyfa ekki kjarnorkuvopn á friðartímum mjög loðinn og teygjanlegur (hvað eru t.d. "friðartímar"?).

https://www.svt.se/nyheter/inrikes/foi-expert-att-inte-tillata-karnvapen-i-fredstid-skulle-kunna-uppfattas-som-undfallenhet-mot-ryssland

Þetta útspil Katrínar er þannig mjög á skjön við umræðuna á Norðurlöndunum og eindregna afstöðu þeirra gegn Rússum í stríðinu í Úkraínu.
Spurning hvort að forsætisráðherrann okkar, og hennar starfslið, sé svona illa að sér um umræðuna ytra eða að hún sé með einhvern yfirdrepsskap, eitthvað leikrit fyrir sitt fólk hér heima sem enn er í andstöðu við NATO-aðildina?
Hvort sem er raunin þá er hætt við að aðrir leiðtogar Norðurlandanna þyki þetta sérkennilegt yfirlýsing, ef ekki beinlínis hlægileg. Hún sé að gera sig að fífli með þessu.

Er hennar tími kannski einfaldlega liðinn - og stjórn hennar að springa?

 

Norðurlöndin beiti sér fyrir kjarnorkuafvopnun