Frekar loðin yfirlýsing!

Freyr: "Hlut­verk landsliðsþjálf­ara er að und­ir­búa sitt lið og stýra því í verk­efn­um með það fyr­ir aug­um að ná sem best­um knatt­spyrnu­leg­um ár­angri. Með það í huga vel ég alltaf það sem ég tel besta liðið hverju sinni."

Það sem hann bætir svo við skiptir í raun engu því þetta er aðalatriðið. Hans (geðþótta)mat gildir alltaf við val á liðinu, sama hvernig leikmennirnir eru að spila og hvar.

Svo þarf Freyr auðvitað að svara fyrir það hvort hann hafi sagt við umrædda leikmenn að val þeirra á landi (og félagsliði) kunni að hafa áhrif á það hvort þær væru valdar í landsliðið eða ekki. 
Yfirlýsingar þeirra benda til þess að hann hafi gert það.

Svona almennt orðuð (og frasaleg) yfirlýsing breytir engu um það.

Skiptir ekki máli hvar leikmenn spila

Skrítnir samningar hjá FH

Nú er FH búið að fá til sín tvo leikmenn frá Stjörnunni sem hafa vermt varamannabekkinn hjá gamla félaginu síðastliðið sumar.
Veigar Pál, sem er nú kominn á tíma, og Halldór Orra sem hefur ekki náð sér á strik síðan hann lenti í hremmingunum hjá Falkenberg.

Er svona mikilvægt fyrir FH að styrkja bekkinn hjá sér?

Viðræðurnar sigldu í strand

Er byrjunarliðið leyndarmál?

Það eru fleiri vináttulandsleikir í kvöld, svo sem hjá Svíum og Dönum og það hörkuleikir: Ungverjaland-Svíþjóð og Tékkland-Danmörk. Frændur okkar eru búnir að birta byrjunarliðin hjá sér en ekkert bólar á því hjá okkur.
Það er að venju því landsliðsþjálfararnir okkar hafa alltaf verið seinastir að tilkynna lið sín. Skrítið að það eigi einnig við í vináttuleikjum.

Svo er auðvitað spurning af hverju sé verið að leika gegn Möltu en ekki einhverju sterkara liði. Ísland er jú hærra á styrkleikjalistanum en bæði Svíar og Danir og ætti því að geta valið úr mótherjum.

Mæta Möltu í fimmtánda sinn

Gaman að sjá Hörð Björgvin spreyta sig!

Þetta var auðvitað fyrirsjáanlegt með Viðar Örn. Það á að verjast, hlaupa og djöflast eins og venjulega hjá þessu landsliði - og því eru tveir hlaupagikkir látnir vera fremstir. 

Vinstri kanturinn er greinilega það sem verður forvitnilegast í leiknum. Hörður Björgvin og lið hans hefur komið á óvart í ensku B-deildinni þannig að hann er auðvitað ágætur varamaður fyrir Ara Frey. 
Þá átti Theodór Elmar fínan leik gegn Tyrkjum og náði vel saman með Gylfa. Vel spilandi leikmaður sem einnig er sívinnandi. Þetta lið getur alveg staðið í Króötunum.

Elmar heldur sæti sínu

Slakt íslenskt lið!

Það er ótrúlegt að þetta íslenska lið hafi komist svo langt að vera í möguleikanum til að komast í úrslit EM á næsta ári. Liðið vantar nefnilega stórlega gæði til að eiga eitthvað erindi í úrslitin. Talað var um að heppnin hafi svo sannarlega verið með íslenska liðinu í fyrri leiknum gegn Úkraínu, því það sást glöggt í leiknum að úkraínska liðið er mun betra en það íslenska.
Ljóst er að íslensku leikmennirnir þurfa að komast út til að eiga roð við bestu liðin. Þó ollu sumir þeir sem spila erlendis vonbrigðum svo sem Aron Elís. Hann á greinilega langt í land að ná alþjóðlegum styrkleika.
Einnig var Rúnar Alexander markmaður slakur í leiknum og átti alla sök á jöfnunarmarki Úkraínu (1-1), sem kom þeim inn í leikinn eftir góðan hálfleik hjá íslenska liðinu.

EM draumurinn er úti

Hver er þessi Björn Bergmann?

Hann hefur ekki sést í leiknum. Frammistaða íslenska landsliðsins í fyrri hálfleik gegn slöku liði Finna er ekkert til að hrópa húrra fyrir.

Þessi leikur er í raun frumraun Heimis Hallgrímssonar landsliðsþjálfara. Sigur er krafan. Til þess þarf að skora mörk. Útaf með Björn þennan og inná með Viðar Örn Kjartansson sem enn er markahæsti leikmaður sænsku úrvalsdeildarinnar með 13 mörk í 16 leikjum þó svo að hann sé ekki lengur að spila þar í landi.

Hann hefur gert fjögur mörk með Tel Aviv í fjórum leikjum, þar af eitt í Evrópudeildinni.
Heimir getur bætt fyrir mistök sín að velja hann ekki í byrjunarliðið með því að láta hann byrja seinni hálfleikinn.

Hádramatískur sigur á Finnum

Hvers á Viðar Örn að gjalda?

Þetta er nú alveg ótrúlegt val, Björn Bergmann Sigurðarson valinn en ekki Viðar Örn Kjartansson!
Þar gerði Heimir Hallgrímsson sín fyrstu mistök sem landsliðsþjálfari og ansi líklegt að þau verði fleiri áður en hann fær pokann sinn.
Hér er smá tölfræði til samanburðar á þessum tveimur mönnum.

Fyrst Viðar Örn: Maccabi Tel Aviv keypti hann á 3,5 milljónir evra (um 500 milljónir íslenskra) sem er hærra verð en Kolbeinn og Jóhann Berg voru nýlega seldir á.

Hann hefur gert fjögur mörk í fjórum leikum með liðinu, þar af eitt í Evrópudeildinni. Með Malmö gerði hann 13 mörk í 16 leikjum!

Björn Bergmann: 2 mörk í fimm leikjum með Molde. Hann var svo ónotaður varamaður í þremur leikjum og ekki í hópnum einu sinni.

Svo segir Heimir að Björn hafi staðið sig best framherjanna undanfarið og að hann hafi verið sá fyrsti af þeim sem Heimir hafi haft samband við!

 

Björn Bergmann og Ögmundur byrja

Í standi til að gera hvað best í þessari stöðu?

Ég býst við að það hafi vakið athygli fleiri en mín þegar Heimir sagði að Björg Bergmann hafi verið að standa sig einna best í sinni stöðu af íslensku framherjunum og því legið beint við að hafa fyrst samband við hann.

Fyrst hélt ég að Heimir ætti við þá sem ekki hafi verið valdir hingað til en svo heyrði ég að hann átti við alla íslensku framherjana.

Svona til samanburðar má nefna að Alfreð Finnbogason hefur verið að spila alla leikina með Augsburg í þýsku úrvalsdeildinni og verið iðinn við að skora. Viðar Örn Kjartansson hefur sömuleiðis skorað drjúgt fyrir Maccabi TelAviv síðan hann kom þangað, og leikið með þeim í Evrópudeildinni, auk þess sem hann var markahæsti leikmaður sænsku úrvalsdeildarinnar þegar hann var seldur þaðan fyrir ekki svo löngu.
Jón Daði hafði einnig verið að standa sig vel með Úlfunum í ensku b-deildinni.

Þetta er því einfaldlega rugl í landsliðsþjálfaranum - og fyrstu mistök hans með liðið. Ef Björn verður svo valinn í byrjunarliðið eru það önnur mistökin - og hálfu verri því þau fyrstu voru aðeins ummæli  ... 

Skil ekki að þetta séu röng skilaboð

Stuðningsmenn MFF ekki hrifnir!

Stuðningsmenn Malmö FF er ekki sérstaklega hrifnir yfir því að Viðar Örn hafi verið seldur. Nú óttast þeir að gullið renni þeim úr greipum og svo finnst þeim verðið lágt (um 450 milljónir króna eða 3,5 milljónir evra!). Þeir gagnrýna stjórnendur félagsins harðlega fyrir söluna - og sumir Viðar reyndar einnig fyrir að vilja burtu.

Ljóst er af þessu að hann nýtur mikils álits í Malmö sem knattspyrnumaður enda ekki að ástæðulausu sem markakóngur deildarinnar.

 

Viðar Örn samdi til fjögurra ára

Dýrari en Kolbeinn og Jóhann Berg!

Þetta verð á Viðari er hærra en Nantes keypti Kolbein Sigþórsson, sem var 3 milljónir evra, og einni milljón evra hærra en Burnley keypti Jóhann Berg Guðmundsson á. Einnig mun þetta vera hærra verð en það sem Wolves keypti Jón Daða Böðvarsson á, jafnvel mun hærra.

Þetta sýnir álitið sem Viðar nýtur ytra en eins og kunnugt er naut hann ekki þessa sama álits hjá Lars nokkrum Lagerbäck sællar minningar! 

Samkvæmt þessu ætti Viðar að vera í byrjunarliði Íslands úti í Úkraínu eftir eina viku.

Viðar Örn á leið til Ísraels?